July 25, 2024

Thantlang Khuaah Hotel Zone Saknak Ding Avoi Khatnak Hmun Hma An Zoh

0

Salai Elvis| 208 March 17| Ramkomh Ministry of Hotel & Tourism zung nih  Thantlang ah Hotel zone sak ding in March 16 khan a voikhatnak hmunhma an zoh ti thawng kan theih.

Hi hmun an zohnak cu Tlangrua lam, Laipawnglung in khaan 2 tluk aa hlatnak Pawhterawn, thinghual tlang ah an zoh. Hi ni ah cunglei in tuanvo ngeitu minung pakhat thlah mi, Thantlang khuanu/pa le sipin committee chairman hna nih an zoh pi hna.

 

“A hmunhma cu a voikhatnak lawng kan zoh a si rih caah zei hmanh a fiangrih lo. A tu kan zohnak Pawhte rawn, Thinghual tlang hi a tha bik lai tiah kan zoh mi a si caah hi hmun zong hi a tha tuk. Ti belte a har deuh lai, hi hmun ah inn 50 hrawng cu ai tlum lai. A voikhatnak kan zoh lawng a si caah tuanvo ngeitu an vun thlah mi nih riantuantu ding hna um nak inn khuachungah rak hlang chung u an kan ti caah inn kan hlan lio pi a si. Hotel lei nih an vun thlah mi zong nih a hmun hi a lungtling ngai te. Zeitin an sak lai le zeitik an lim lai, an sak ning muisam tibantuk cu kan hngal ve rih lo.” tiah khuanu/pa tuanvo ngeitu Pu Lawm Bik nih TCP ah a chim.

 

Atu bantuk in Thantlang ah Hotel Zone sak timhnak cu Febuary thla Vice President Pu Henry Van Thio Thantlang a phak lio ah Hotel le khualtlawng tlaitu bu a si mi Daw Tin Tin Lwin nih khuanu/pa hna sinah hmun hma nan ka pek khawh ahcun Thantlang ah Hotel Zone kan sakpiak hna lai tiah bia a rak kamh bal cang hna.

Cu tan lila ah Hotel le khualtlawng tlaitu bu hna nih Thantlang khua caah sing 60 laksawng an rak pek hna. Hi rian an thok khawh ahcun Chin ramchung ah Hotel Zone a pakhatnak Thantlang ah a um hi a si lai tiah theih a si.+++

About The Author

Na ruahning rak langhter ve.. (Leave a comment)