Thantlang Khuami Nih Vice President Pu Henry Van Thio Sia Le Vok Thah Piak An Timh

Vice President Pu Henry Van Thio cu Thantlang khuami nih Sia le Vok an thah piak lai tiah tuanvo ngeitu sinin theih a si.

A khual lam a kir lei February 4, Zarhpi ni zanlei ah rawl dumtinak Thantlang Baptist Church (TBC) ah a tubantuk in khuanu/pa nih an tuah piak an timh hi a si.

“Khual le a mah Vice President a zultu, riantuan tu hna le motor mawng tiangin minung 200 leng kai cu an si lai, khua upa hi minung 100 leng kai cu kan sawm ve hna. Hi kan thah piak mi zong hi khua chung i nu le pa, bochan mi le bawmh hal chawm in tuah mi a si. Lak sawng zong tam cu kan pe kho hna lai lo, a phung men tein lai thuam, puan le angki cu kan pek ko hna lai. A tu bantuk in a voi hnihnak Thantlang a rak tlun cu khuanu/pa nih kan hal ding mi thil a hmun le hma tiang in hmu seh ti kan duh caah, a hlan kan in zohfel chung nak le timhtuah nak zong kan rak ngei ve.” tiah khuanu/pa Secretary Pu Siang Cung Bik nih TCP ah a chim.

Vice President Pu Henry Van Thio don ding in Thantlang khuami cu timhtuahnak tha taktak in an ngei cang. Lai hlasaknak, Saki, Khuang le Dar in hlunghlai tak in don an timh. Thaizing Febuary 3, suimilam 6:30 ah Lai thuam he Vice President Pu Henry Van Thio don ding in khauchung ah tlang zong an au cia cang tiah theih a si.

Pu Van Thio cu nikum Chiram a rak tlawn lio zing khan Thangtlang bu kip fonh (TCF ) zong nih Sia le Vok an rak thah piak cang.

Leave a Commnet

%d bloggers like this: