Thantlang peng ralzaam hna caah i thlopbulnak a har

0

The Chinland Post | 2023 January 27 — Chin ramkulh, Thantlang peng chung ralzaam pawl an zawt i sii-ai thlop an herh tik ah Khualipi Hakha bantuk sii a tlinnak hmunhma ah va thlop ding cu a har ngai tiah ralzaam bawmtu pawl nih VOA ah an chim.

Thantlang khua a kanghnak hi kumkhat leng a si cang ko nain dirh ṭhan a si rih lo bantuk in ralzaam tampi zong an umnak hmun an kir kho rih lo tiah theih a si.

A luancia 2021 September thawk in Chin ramkulh, Thantlang khua ah SAC ralkap le CDF hna karlak ah kahdohnak a chuak i khuami tampi nih innlo an zaamtak. Thantlang khuami hna cu khua he aa hlatnak khuate pawl ah an i dor tiah theih a si.

“Khuacaan aa thlen tik ah mi tampi an zaw, eidin le ngandamnak caah harnak tampi a um. Operation tuah a ngahnak sizung hi a um lo ti tluk khin a si. Siikhaan piah an duh a si ahcun tangka a ngei deuh mi hna ca lawng ah a tlamtling. A caan caan ah cun zawt i theih ko zong ah tangka ngeih lo ahcun an i in ko. Ngandamnak caah a ṭha mi eidin nih le phorh khawh a si lo, Coffee Mix hmanh fawite in cawk khawh a si lo” tiah ralzaam bawmtu pakhat nih VOA ah a chim.

Thantlang le Hakha hi meng 23 lawng aa hlat. Chin ramkulh khualipi he aa hlat tuk lo nain va thlop duh ahcun SAC ralkap lei nih himnak an rengh tuk i biahalnak a tam tuk caah umkalnak hi thinphang a si tiah adang ralzaam pakhat nih a chim ve.

“Ka hin cun lam zong a ṭha lo, Thantlang cu a remh zong an remh ṭhan lo, lam zong a hlan bantuk in a chia ṭhiamṭhiam. Sii zong a um lo, Hakha lei kan kal ahcun biahal a tam tuk. Tlaih zong a tam tuk caah a herh lo cun kan kal ngam lo. A biapit tuk lawng ah kan kal. Sau zong kan um ngam lo. Innlo panh ṭhan hi kan duh lo a si lo. Ralkap an um chung cu kan kir kho lo. Kan kir ahcun an kan kah ko lai. Umnak inn zong kan ngei ti lo. Ti zong a um lo, mei zong a um lo. Eiawk zong a um ti lo caah kir hrim khi kan ngah lo” tiah a chim.

Thantlang khuami hna an chuah hnu zong ah SAC ralkap nih hmunhma an khuar rih. Thantlang khua hi SAC ralkap nih voi 20 leng an khangh i mipi inn 1,000 leng ah biakinn tampi zong a ciam cang.

About The Author

Na ruahning rak langhter ve.. (Leave a comment)

%d bloggers like this: