Thantlang sii-inn Altrasound Lei Thiamsang An Um Lo Caah An Hmang Kho Lo

Salai Elvis| 2018 March 10| Thantlang sii-inn pi ah nau pawi mi zohnak Althrasound a um ko nain a tlaitu ding thimsang an um lo caah an hmang kho lo tiah thawng kan theih.

“Althrasound lei a thiam deuh mi le a tlaitu an um lo caah nau pawi hna i zoh chungnak caah cun kan hmang kho lo. Si nain siizung ah nu nau hlai in a ngei ding pawl tu hna cu kan zoh khawh ko hna. An nau te kha a lu lei in maw a chuah lai a ke lei in maw, cun a um ning a tha maw timi pawl cu kan mah nih kan zoh ve ko hna. Hi kongah Hakha sii-inn lei thiamsang hna raktlung in zarhkhat ah voi khat maw voi hnih hna nu nau pawi zohter dingin kan rak cah bal hna nain an ra rih lo. Ra kho hna sehlaw nu nau pawi Hakha lei kal hau lo in a tlam tling ngai ve hnga.” tiah sii bawi Dr. Van Van nih The Chinland Post ah a chim.

Atu bantuk in Thantlang ah nu naupawi hna nih naute nu le pa theih khawhnak zohter khawh a si lo caah tangkaa dih in Hakha sii-inn an kal in an i zohter tawn hna.

Thantlang sii-inn Althrasound cu Vice President Pu Henry Van Thio a voikhatnak Thantlang a tlawn lio ah X-ray(dat-hman) he rak hal a si i rampi cozah nih a rauh hlan ah a tu bantuk in an pek colh hna hi a si.

Thantlang sii-inn ah a tulio siibawi caantling riantuan ha siibaawi he telh in minung 5 an si i pahnih sianginn an kai caah pahnih lawng a tu lio ah an um. Mah pin ah a leng in ralkap siibawi 2 nih an bawmh chinh hna. Atu lio Thantlang sii-inn ah ngakchia chungthlet zawtnak in sii-inn a um mi an tambik tiah theih a si.+++

Na ruahning rak langhter ve.. (Leave a comment)

%d bloggers like this: