May 29, 2024

Thawng Bawi Telh In Lai Hlasak Thiam Pali Nih Kum 30nak Chin Miphun Dothlennak Ni Ah Hlasaknak An Ngei Lai

0

City Hunter| 2018 March 16| Camp Victoria ah tuahdingmi kum 30nak Chin Miphun Dothlennak (Revolution) Ni ah Chin Rocker hlasak thiam P. Cung Lian Thawng telh in Lai hlasak thiam minung pali nih hlasaknak an ngeihpiak hna lai tiah kan theih.

Kum 30nak Chin Miphun Dothlennak Ni cu March 20, India ramri, CNF/A (Chin National Front/Army) umnak hmunpi Camp Victoria ah an tuah lai. Ramchung in zatlang mibu, ramkhel upa, party upa, mino bu, nubu tibantuk bochanmi mibu le upa pawl tampi an sawm hna. Nunphung laam hmuhsaknak le hlasaknak zong an ngei lai tiah tuanvo ngeitu CNF upa hna sin in theih a si.

Chin Miphun Dothlennak Ni ca hlasaknak (show) ngeih dingmi kong he pehtlai in Chin Rocker hlasak thiam P. Cung Lian Thawng @Thawng Bawi nih atu bantuk in The Chinland Post ah a chim.

“Tutan Camp Victoria ah tuahdingmi Chin Miphun Dothlennak Ni ah ringawn lei thilri (music instrument) le hlasatu vialte kong ah CNF/A sponsor a tuahtu company hna nih keimah tuanvo a kan pek. Ka thilri vialte i phorh in hlasatu pathum he kal kan i tim. Hlasatu ding sawmmi le kal ding in bia a ka letciami hna cu; Biak Tha Cuai, Tawk Men le Jolie Ngun an si. Keimah he telhchih in hlasatu hi minung pali kan si lai”.

“Sponsor petu nihcun nu pathum le pa pakhat a kan ti. Asinain pa hi Mang Lian Chawn tibantuk midang ka sawm len hna nain a ra kho ding an si lo caah kanmah lawng kan si ko lai. Tutan hlasaknak kong he pehtlai in anmah CNF he kan i chawnbia lo, sponsor a tuahtu company he lawng pehtlaihnak kan i tuah. Anmah CNF/A lei in midang an sawm ve mi hna a um le um lo ka hngal lo” tiah P. Cung Lian Thawng nih a biapeh ah a chimchih.

Tutan Chin Miphun Dothlennak Ni hlasaknak lei sponsor tuahtu hi Lai company an si. Lian Hnin Mang (Deirel company) le Cung Pi (Jehova Jere) company an si tiah kan theih.

Chin media pakhat nihcun Chin Idol cotu Esther le Lai rapper Paling an sawm hna tiah a tial. Asinain Paling The Chinland Post nih Paling pehtlaihnak kan tuah tikah zeihmanh a kan sawm lo. Cun a kan sawm hmanh ah a um ding ka si lo caah a kal thiam ding ka si lo tiah a kan leh.

About The Author

Na ruahning rak langhter ve.. (Leave a comment)