Thayetchaung, Yange Khua Ah Hmunhma Khuar Ding In A Ra Mi SAC Ralkap Pawl Bomrap An Puah Hnawh Hna I 25 An Thi
The Chinland Post | 2023 August 28 — Taninthary ramṭhen, Thayetchaung peng, Yange khua ah hmunhma khuar ding in a kal mi SAC ralkap pawl cu PDF phufonh nih voi 2 tiang bomrap an puah hnawh hna caah SAC ralkap 25 an thi, 5 an i hliam tiah Kasedo Company 3 sin in thawng theih a si.
A luancia August 24 zaanlei 5:00pm hrawng ah Kamyaing khua le Yange khua karlak ah thazang 100 leng SAC ralkap pawl cu PDF phufonh nih bomrap lung 6 in an puah hnawh hna i meithal zong in an kah chih hna tiah theih a si.
Cubantuk in bomrap an puah hnawh hna caah SAC ralkap 15 hrawng an thi i tampi an i hliam tiah Kasedo Company 03 nih an chim.
PDF phufonh pawl nih an kah hna ruang ah a sung tuk mi SAC ralkap pawl cu August 25 zinglei sml 9:00am hrawng ah Yange khua, Mwe tlang ah hmunhma khuar ding in an rak kai ṭhan lio ah PDF phufonh pawl nih bomrap lung 7 in an puah hnawh ṭhan hna i 10 hrawng an thi, aa hliam mi zong an um tiah theih a si.
A thi mi SAC ralkap pawl ruak le hliam a tuar mi pawl cu Infantry 404 Battalion chung ah an kalpi hna tiah Kasedo Company 03 nih cun an langhter.
Kahdohnak chung ah Kasedo Company C03, Kya Yaing Guerrilla phu, Kalonemin Guerrilla phu hna an i bawm i PDF phufonh pawl nih Dawei-Palaw lam ah hmunhma zohfelnak an tuah i SAC kuttang palek pawl Uniform a thar pawl an lak khawh i an khangh tiah theih a si.
About The Author
