Thlahlawh Pek Lo In A Zammi Rian Ngeitu Ruang Ah Sehzung An Khar

City Hunter| 2018 August 8| Magwe ramthen Pakokko khua in Myanmar Fu Fung thilpuan sehzung ah riantuantu hna cu thlakhat ca thlahlawh pek lo in rian ngeitu a zaam caah cu sehzung cu cozah nih August 7 ah an phihkhar.

Sehzung ah a taangmi seh thilri hna le thilpuan pawl tender zuar in riantuantu hna thlahlawh pek an si lai tiah Pakokko peng in ramthen hluttaw palai U Han Zaw Win nih a chim.

“Riantuan man thlakhat ca thlahlawh pek ding a taang. Anmah cu an zaam cang. An chiahtakmi thilri pawl seh thilri le thilpuan pawl cu cozah runvengtu hna nih an hngah i sehzung cu an phihkhar. Riantuannak lei vuanci zung he i ceihmai in thilri cu tender in an zuar lai. A ngeitu um lo caah tender zuarmi in kan hmuhmi chawva in khan riantuantu hna thlahlawh man pek ding in ceihmainak kan ngei.”

Thlahlawh pek ni caan a simi August 5 i thlahlawh an ngah lo caah August 6 tiang riantuantu hna nih an hngah hnu ah rianngeitu a zaam ti an theih hi a si.

August 7 zan ah sehzung chung riantuantu hna tonpumhnak an ngeih caah htwe-oh zung, palek zung, riantuannak lei zung, hluttaw palai hna nih riantuantuantu hna cu va biakchawnhnak le ceihmainak an ngeihpi hna.

Sehzung ah a taangmi thilri man hi riantuantu hna hruaitu hmai ah an tuak i cozah nih an phihkhar. Hiti thilri cu tender zuarnak caah a ralaimi August 12 ah riantuantu hna he a dikthliar in ceihmai a si lai.

Myanmar Fu Fung thilpuan sehzung hi Tuluk rammi ngeihmi sehzung a si i riantuantu hna a za renglo an um tiah U Han Zaw Win nih a chim.
Ref: RFA

Na ruahning rak langhter ve.. (Leave a comment)

%d bloggers like this: