Thlahnih chung CNA, CDF-Thantlang phufonh le SAC ralkap karlak kahdohnak (Tilim Operation) ah SAC ralkap 20 an thi, mipi hriamtlai phufonh lei in 6 an nunnak a liam
The Chinland Post | 2023 February 27 – CNA le CDF-Thantlang phufonh nih ni 60 chung kahdohnak (Tilim Operation an tuah i cu chung ah SAC ralkap 20 an thi, 25 nak tlawm lo nih hliam an tuar i mipi hriamtlai phufonh lei in 6 nih ram le miphun caah an nunnak an pek tiah CDF-Thantlang nih February 26 ah a thanh.
2022 December 29 in Tilim Operation an thawk i 2023 January 1 ah Thantlang khua um SAC palek sakhaan chung ah a um mi inn 5 an khangh khawh, January 2 ah palek sakhaan chung adang inn 2 an khangh khawh chap tiah an langhter.
January 29 ah SAC Helicopter 1 rawk lak in an kah khawh i February 26 zong ah SAC Helicopter adang pakhat an hrawh khawh tiah theih a si.
Cun, February 1 ah Thantlang khua CB Bank ah hmunhma a khuar mi SAC ralkap le palek 6 zong hriam zuun 8 he an tlaih khawh hna.
February 8 ah SAC chungtel 50 hrawng nih hmunhma an khuarnak Thantlang palek sakhaan cu CNA, CDF-Thantlang phufonh nih an kah hna i sakhaan an lak khawh leng ah hriam zuun 40 leng an lak khawh tiah an thanh.
Ni 60 chung kahdohnak (Tilim Operation) chung ah SAC ralkap a thi mi an tam bantuk in CDF 4 le CNA 2 nih ram le miphun caah an nunnak an pek ve.
SAC palek sakhaan CDF-Thantlang, CNA nih an lak hnu in vanlei kahdohnak voi tampi le hriamngan voi tampi a hman tiah theih a si.
February 9 in February 26 tiang Thantlang khuachung kahdohnak ah SAC nih Helicopter le Vanlawng hmang in kahdohnak voi 95 leng a tuah tiah an langhter.
SAC chungtel pawl he nifatin in kahdohnak a fak peng i hriam le kuan zong tamtuk hman a si cang leng ah kahdohnak a fak chin kho rih mi a si tiah CDF-Thantlang nih a thanh.
About The Author
