Timit kahdohnak ah SAC ralkap 60 nak tlawm lo an thi, tampi an i hliam tiah CNF nih a thanh

The Chinland Post | 2022 September 1 – Chin ramkulh, Hakha pawng, July 30 – August 31 tiang Timit pawngkam m kahdohnak ah SAC ralkap 60 nak tlawm lo an thi i tampi an i hliam, CDF-Hakha in hriamtlai pakhat a nunnak a liam tiah Chin National Front (CNF) nih September 1 ah a thanh.

Chin ramkulh SAC hruainak in timtuahnak a simi Thantlang khua sersiam ṭhannak timi tlangtlar hmang in Hakha le Thantlang karlak ah a ummi mipi hna nih hman ti lomi Timit hlei cu remh ṭhan in CNA le CDF phu hna hrawh ding timi ruahchannak he thazang 80 leng SAC ralkap cu July 30 ah Hakha in Timit lei ah an kal.

Timit hlei remh ding in a thawhmi SAC ralkap pawl cu CNA, CJDC, CDF-Thantlang, CDF-Zophei, CDF-Lautu, CDF-Mara le CDF-Hakha phufonh hna nih ni 31 leng fak ngai in an doh hna.

Thlakhat chung kahdohnak ah SAC ralkap 60 nak tlawm lo an thi i tampi nih hliamhma an tuar.

CDF-Hakha hriamtlai a simi Salai Than Hei Lian nih ram le miphun caah a nunnak a pek i hriamtlai 5 fak tuk loin an i hliam tiah CNF cathanh chungah hmuh khawh a si.

Atulio hi SAC ralkap le mipi hriamtlai phufonh hna karlak ah kahdohnak a chuak peng rih ko i SAC ralkap nih Falam lei vawlei le vanlei in thazang le hriam a chap lengmang tiah theih an langhter.

Na ruahning rak langhter ve.. (Leave a comment)

%d bloggers like this: