Timit pawngkam kahdohnak thla 1 deng a rau cang, SAC ralkap a thimi an tam
The Chinland Post | 2022 August 26 – Chin ramkulh, Hakha le Thantlang karlak timit pawngkam hrawng ah SAC ralkap le Chin hriamtlai phufonh hna karlak kahdohnak hi thlakhat deng a rau cang i SAC ralkap lei in a thimi an tam cang tiah theih a si.
SAC ralkap cu Hakha-Thantlang karlak ah a ummi CDF-nih rak hrawhmi hlei cu remh ding timi tlangtar in a luancia July 30 ah cuka hmunhma ah an rak phan i CNA telh in mipi hriamtlai phu pawl he cu ni thok in nifatin kahdohnak a chuak.
“SAC nih July 30 ah Hakha khua a ummi Thantlang Pastor pawl an auh hna i Thantlang khua sersiam ṭhannak timi tlangtar in bia an ruah hna, cubantuk thil an tuah khawhnak hnga ahcun Thantlang le Hakha karlak Timit hlei kha an remh ṭhan a hau, Timit hlei an remh ṭhan khawhnak hnga cuka hmunhma a pawngkam kha an tlaih khawh a hau, hmunhma an tlaih khawh lo cun hlei an remh kho lai lo. Hmunhma an tlaih khawh ahcun hlei an remh lai, cun Thantlang peng hmunhma tlaih khawh hnga kha an i ruahchan caah aa dawhnak in tlang an tar i kahdohnak an tuahmi a si” tiah CNA biachimnak nawl a ngeitu Salai Htet Ni nih Khonumthung Burmese ah a chim.
Chin ramkulh aa dawhnak Timit kuang hrawn cu Hakha in meng 7 lawng aa hlat i Hakha in Thantlang lei kan kal a si ahcun Timit hlei zawh a rak si. 2021 voikhat, 2022 July 28 ah voikhat tiah CDF nih voihnih an rak puah.
SAC ralkap pawl nih Timit hlei an remh khawh a si ahcun Thantlang khua ah bawmhnak le thil pawl khulrang in an chanh khawh lai i Thantlang le a pawngkam an tlaih khawh lai lengah CDF pawl an cawlcanghnak kha a hrawh khawh lai tiah Salai Htet Ni nih a ruahdamh.
Kahdohnak hi a rawkmi Timit hlei a tanglei ah a si i CNA telh in CDF-Zophei, CDF-Hakha, CDF-Thantlang, CDF-Lautu le CJDC hna fonh in an doh.
“Kahdohnak chungah Hakha hrambunh LIB 266 nih hriamngan in voi tampi kah a bawmh hna i Helicopter zong in hriam a chap lengmang. Jet fighter zong a rak raa bel i kahdohnak hi a rau kho rihmi a si” tiah Salai Htet Ni nih a ruahdamh
Thlakhat deng a rau cangmi Timit pawngkam kahdohnak ah SAC ralkap 50 hrawng an thi cang lai i SAC ralkap hriam cheukhat zong CDF nih an lak khawh.
Kahdohnak ah CDF-Hakha hriamtlai a simi Salai Thang Hei Lian cu August 25 ah hriamngan ci nih a khen i a nunnak a liam. Thakhat deng kahdohnak chungah Chin hriamtlai phufonh lei in hliam a tuarmi tlawmpal te lawng an um tiah theih a si.
About The Author
