AA le CDF-Daai nih eidin phih ruangah Paletwa peng Tantaung khua pawngah a ummi SAC ralkap pawl nih tilawng 33 in sakhaan an chuahtak

The Chinland Post | 2022 August 29 – Chin ramkulh, Paletwa peng, Tantaung khuate pawngah a ummi SAC ralkap sakhaan le palek sakhaan pawl cu AA le CDF-Daai nih eidin an phih hna caah cuka hmun ummi SAC kuttang ralkap le palek pawl nih sakhaan an chuahtak i tilawng 33 in Rakhine ram, Minpya peng lei ah an kal tiah a si.

“August 24 zaanlei ah sakhaan an kaltak i tilawng 30 in Wat tiva an zul i Rakhine ram lei ah an kir tiah theih a si. Lay khua tiva kam palek sakhaan, mah tlangcung ah ralkap sakhaan a um. Palek le ralkap he cun 150 hrawng an um. AA le CDF nih an ceh hna i eidin an phih hna. Kahdohnak cu a um lo, eidin lawng an phih. AA nih eidin a rak phormi SAC ralkap vanlawng an kah tawn, cu hnuah sakhaan an chuah tak” tiah CDF-Daai Brigade Commander Salai Nay Min nih Khit Thit ah a chim.

Tantuang khua pawngah a ummi SAC ralkap le palek sakhaan cu Chin ramkulh le Rakhine ram tan in a luangmi Lay khua tiva kam ah a ummi a si.

Cuka sakhaan pawngkam ah AA le CDF-Daai nih hmunhma zohfelnak an tuah i hriam cheukhat zong an lak khawh tiah CDF-Daai nih Brigade commender nih a chim.

SAC ralkap pawl nih sakhaan an kaltak hnuah Tantaung sakhaan pawng a ummi mipi hna nih himnak hmun ah zaam colh ding in CDF-Daai nih a thanh.

A luancia zarh chung zongah, Rakhine le he aa pehnak Kaladan tiva le Lay khua tiva kam ah a ummi SAC ralkap sakhaan 5 cu AA le an rak lak bantuk in Rakhine zongah AA le SAC ralkap karlah ah kahdohnak a fak peng.

Na ruahning rak langhter ve.. (Leave a comment)

%d bloggers like this: