June 20, 2024

Tonzang Khua An Sungh Nakhnga Lo SAC Nih Fak Pi In Kahdohnak A Tuah

0

The Chinland Post | 2024 May 22 — Chin dothlennak phu pawl nih tlamtling tein an tlaih khawh nakhnga an i zuam cuahmah lio mi Chin ramkulh, Tonzang khua an sungh nakhnga lo SAC lei nih van lei in kahdohnak fakpi a tuah tiah theih a si.

India-Myanmar ramri, Chin ramkulh chaklei ah a um mi Tozang khua la kho ding in Chin dothlennak phu pawl nih May 17 thawk in kahdohnak an tuah. Khuachung hmunhma tampi an lak khawh cang nain a zaam mi SAC ralkap pawl he kahdohnak pehzulh in a chuak rih tiah theih a si.

April 22 zinglei sml 2:00am thawk in Tonzang khua pawngkam cu SAC ralkap nih van lei in kahdohnak pehzulh in a tuah tiah theih a si.

“Bom hi rel cawk a si lo, a za in a si lai. Zing sml 11:00am hrawng ah voikhat a thlak ṭhan” tiah Tonzang peng mipi uknak phu ṭuanvo ngeitu nih Myanmar Now ah a chim.

Tonzang khua palek sakhaan, meithat sakhaan le Na-tah-lah hmunhma pawl cu dothlennak phu pawl nih an lak cang. SAC ralkap pawl cu khua thlanglei ah an kir hna i Cyclone Shelter ah an i dor hna caah dothlennak phu pawl he pehzulh in kahdohnak a chuak.

Tonzang khua kahdohnak ah kaphnih lei a thi mi an um bantuk in hriam cheukhat zong an lak khawh tiah CNF chimphuannak nawl a ngeitu Salai Htet Ni nih Myanmar Now ah a chim fawn.

“Kahdohnak chung ah hriam zuun 50 kan lak khawh. SAC lei ruak 11 kan char fawn. Kanmah lei minung 2 an nunnak a liam, 10 hliam an tuar” tiah Salai Htet Ni nih Myanmar Now ah a chim.

Tonzang khua chaklei ah a um mi Cikha khua ah hmunhma a khuar mi SAC ralkap pawl cu Tozang khuachung ah an i fonh caah Cikha khua cu Chin dothlennak phu pawl nih May 19 in an tlaih cang.

Tozang khua ah Tedim peng hrambunh SAC LIB 269 le palek pawl, ZRA hna bawm in a cawlcang mi an si.

ZRA hi 1993 ah rak dirh mi phu a si i 2005 ah India ram ramri hngak ralkap ah an rak i thleng, Manipur ah hram an bunh. Hramhram uknak kan doh lai tiah SAC nih hramhram in uknak a rak lak ka lio hrawng ah cathanh an rak chuah bel ve.

Tozang khua kahdohnak ruang ah khuami le a pawngkam khua in minung 8,000 leng himnak hmun ah an zaam hna tiah theih a si.

Cun tar, upa le a ngandam lo mi pawl a za in khuachung ah an tap hna tiah Myanmar Now sin in thawng theih a si.

About The Author

Na ruahning rak langhter ve.. (Leave a comment)