Tonzang Khua Cu SAC Ralkap An Thiang Cang
The Chinland Post | 2024 May 24 — Chin ramkulh chaklei, Tozang khua ah SAC ralkap an thiang cang tiah CNF/A biachimtu Salai Htet Ni nih Khonumthung Burmese ah a chim.
May 23 zaanlei sml 4:30pm hrawng thawk in SAC ralkap pawl hnu an tolh dih cang caah khuachung Operation ni 10 a rauh hnu ah Tonzang khua a ning in an tlaih cang i SAC ralkap pakhat hmanh an um ti lo tiah Salai Htet Ni nih cun a chim.
“Atu hi zaanlei sml 4:30pm hrawng in SAC ralkap pawl cu Tonzang khua ah pakhat hmanh an um ti lo. Bawmhnak a raa mi pawl zong Tedim lei ah an kir. Tozang khua cu SAC ralkap an thiannak dirhmun a phan cang tiah chim ka duh” tiah a chim.
Tozang khuachung ah SAC ralkap pawl nih an i thuhnak hmunhma pawl a pawngkam ah bomrap an hmanh tak caah hmunhma zohfelnak kan tuah rih a herh tiah a chim.
Tozang khua lak Operation hi Chinland cozah, Defense Ministry nih a tuah mi a voikhatnak bik Operation a si i May 15 ah SAC ralkap sakhaan pawl kah hram an thawk i May 19 cun Cikha khua an lak khawh hnu ah May 21 ah Tozang khua um sakhaan zapi an lak khawh dih.
SAC nih Tonzang khua a sung nakhnga lo vanlawng 4 in bawmhnak a pek leng ah van lei in kahdohnak fak taktak a tuah ko nain Chin dothlennak phu pawl nih an kham hna i an kah hna caah May 23 ahcun an zaam dih hi a si.
Tonzang khua lak kahdohnak ah SAC sin in tangka sing a thong in an lak khawh bantuk in ralkap pawl zong an tlaih mi hna a um, hriam zong tampi an lak khawh tiah theih a si.
About The Author
