Tuluk Wanbao Company Ah Rianṭuan Ding In A Ra Mi Pyithusit 14 An Tlaih Hna
The Chinland Post | 2023 August 25 — Sagaing ramṭhen, Salingyi peng, Letpadaung tlang Copper Project (လက်ပံတောင်းတောင် ကြေးနီစီမံကိန်း) ah rianṭuan ding in a ra mi SAC kuttang pyithusit 14 cu August 24 zinglei ah an tlaih hna tiah Chindwin Galone Yarzar Guerrilla Defense Force nih thawng an thanh.
Copper Project Wanbao Company chung ah rianṭuan ding in Irrawaddy ramṭhen, Thabaung peng in Northwest Command ah pyithusit cawnnak a dih cang mi an si hna tiah cathanh chung ah an langhter.
An tlaih mi hna cu Salingyi peng mipi himnak phu sin ah an kuat hna tiah theih a si.
Wanbao Company ah hmunhma a khuar mi SAC ralkap pawl nih a pawngkam khua hna ah hriamngan an kah, khuate chung an lut i mipi inn an khangh tawn tiah RFA nih a langhter.
SAC a cohlang i SAC he rian a ṭuanṭi mi Wanbao Company i Copper Project cu Wanbao Company le Yangtze Company, SAC nih a ngeih mi မိုးကြိုး ဆာလရစ်အက်ဆစ် sezung hna nih an ṭuan mi a si i mipi hna zong nih August 20 ah duhlonak an rak langhter.
Letpandaung Copper Project a pawng ah um mi Wathme khua cu August 8 ah Wanbao Company nih hau an kulhpiak hna i khuami cheukhat zong August 18 thawk in SAC ralkap pawl le Company nih hramhram in an ṭialter hna tiah RFA nih a langhter.
About The Author
