Kawkareik Ah Pehzulh In Kahdohnak A Chuak I SAC Lei 20 Nak Tlawm Lo An Thi
The Chinland Post | 2023 August 25 — Karen ram, Kawkareik peng chung, July 19, July 27 le August 8 ah SAC ralkap le dothlennak phu pawl karlak ah kahdohnak a chuak i SAC lei 20 an thi, tampi an i hliam tiah Naga Phyu sin in thawng theih a si.
July 19 ah Kawkareik peng, Kawnuai khua sianginn ah hmunhma a khuar mi SAC Infantry 343 le BGF pawl cu KNLA, Naga Phyu, Kyapyu phu hna nih an kah hna i SAC kei 6 an thi, 8 an i hliam tiah theih a si.
Kahdohnak chung ah hliam a tuar mi le a thi mi pawl cu mizaw phor mawṭaw 10 in an rak thir hna tiah theih a si.
Cun Sniper Mission in July 27 ah Kawkareik khua, ti lionak (ရေကူးကန်) le Kamine khua thlaan ah hmunhma a khuar mi SAC ralkap Infantry 202 cu Sniper in an kah hna i SAC ralkap 11 an thi, 6 an i hliam tiah theih a si.
Cubantuk in August 8 ah Kawkareik peng, Kawnuai khua, Asia lam lei in a rak lut mi SAC ralkap pawl cu August 8 ah dothlennak phu pawl nih an kah hna i SAC lei 3 an thi, 5 an i hliam, Vigo mawṭaw 2 zong a rawk tiah Naga Phyu phu nih an langhter.
Kahdohnak pawl chung ah dothlennak phu lei him tein an kir kho tiah theih a si.
About The Author
