UN Special Envoy Rohingya ralzaam camp a tlawng
The Chinland Post | 2022 August 24 – Myanmar ram he pehtlai in Un Special Envoy Noeleen Heyzer cu chungtel 4 he Bangladesh ram ralzaam camp ah August 23 ah a tlawng.
Ms Noeleen Heyzer cu Cox’s Bazar ralzaam camp ah a kal hmasa i camp rianngeitu pawl, ralzaam pawl he biaruahnak an ngeih bantukin eidin khonnak inn le ngandamnak zung hna a zoh.
A tonmi hna ralzaam pawl nih Myanmar ram kir ṭhan ding an duh ko tiah UNHCR rianngeitu Regina De La Portilla nih a chim.
Myanmar ram in an zaamnak hi kum 5 chung a luh cang caah an harnak philh piak lo ding in ralzaam pawl nih ramdang bawmtu pawl nawlnak an tuah.
Rohingya pawl hi bawmhnak an herh bak ko tiah UNHCR zong nih August 23 ah a thanh.
Myanmar ram ahcun Rohingya timi biafang hi an cohlan lonak kong le ralzaam pawl an umnak hmun kuat ṭhan ding in Bangladesh nih ramhnih karlak hnatlaknak an ngeih ning in cazin a kan pe lo tiah SAC ramdang lei Minister nih Noeleen Heyzer he tonnak an ngeih lioah a chim.
Million tampi ralzaam Bangladesh ram an phak hi kum 5 a si cang nain ramhnih hnatlaknak an ngeih ning in ralzaam kuat ṭhannak program cu tuah kho ti loin an tap.
About The Author
