USDP party Chairman le Vice Chairman hmunhma ah palek bawi hlun U Khin Ri le Lt. General hlun U Myo Zaw Thein hna an kai lai

The Chinland Post | 2022 October 5 – USDP party Chairman hmunhma cu palek bawi hlun U Khin Ri le Vice Chairman (1) hmunhma cu Lt. General hlun U Myo Zaw Thein hna nih an pehzulh lai tiah theih a si.

October 4 zinglei, Naypyitaw ah an tuah mi a voi thumnak USDP pary Conference a nikhatnak ni ah atu bantuk in an thim hna hi a si.

Party Chairman U Khin Ri cu a hlan ah Myanmar ram palek bawi a rak ṭuan bal i hramhram in uknak lak a si hnu ah SAC nih Ministry of Immigration ah Minister rank a pek i September 9 ah SAC nih a rian in an dinhter ṭhan mi a si.

Lt. General hlun U Myo Zaw Thein cu a hlan ah SAC i raltuknak lei lutlai pakhat a si nain an dinhter i atu ahcun USDP Vice Chairman ah an thim mi a si.

Cun USDP party Secretary hmunhma cu a hlan i Ministry of Home Affair Deputy Minister a rak ṭuanmi General Aung Soe an thim tiah theih a si.

Conference a nikhatnak ni ah Party Chairman hlun U Than Htay nih hramthok bia a chim i a kum upat cang ruang le tai fah zawtnak i thlop ka hauh caah a raa laimi thimnak ah party rian pawl ka ṭuan kho ti lai lo caah ka din tiah a chim.

Na ruahning rak langhter ve.. (Leave a comment)

%d bloggers like this: