Vice President Henry Van Thio Nih Hakha Le Thantlang Caah Bawmhnak A Pekmi Cheukhat

City Hunter| 2018 February 11| Kawlram ramkomh Vice President Henry Van Thio February 3-7 tiang Chinram a tlawnnak ah bawmhnak pek ding in bia a kamhmi, tuaktaanpiak ding a timi le a zohfelmi tampi lakah Hakha le Thantlang peng caah thiltha a kan tuahpiakmi kan hngalh khawh tawk kan hun langhter lai.

 

Tutan Vice President a khuallam ah ramkomh minister pakhat, deputy minister pathum, ramkomh cozah zung in General Director le Director tampi nih an rak zulh.

 

Hakha Caah

1. Hakha le Falam caah Laiva dinti laakpiak ding a si. Falam ca cu an laak cuahmah cang. Hakha ca tiang hman khawh a si le si lo thiamsang pawl zohter in laak khawh ding a si caah laakpiak ding in bia a kamh hna. Laikua tidil tiang a tlun pah ah a zoh.
2. Hakha sii-inn ihkhun 200 a simi kha ihkhun 500 in pekding.
3. Computer University le Technological University pekding le Hakha College chak ah sakding in a hmunhma a zoh.
4. Mid-wife (taa-phua) sianginn saknak ding hmun le Hakha Education college sakmi hmun a zoh.
5. Hakhathar (Cyclone sector) a zoh.

 

Thantlang Caah

1. Ma-ha-dat-aa line mei a herhning in tuahpiak ding.
2. Thantlang khuapi caah a herhning in dinti laakpiak ding.
3. Thantlang vanlawng tual saknak ding hmun a zoh.
4. Thantlang ihkhun 50 sii-inn kha ihkhun 100 in pekding.
5. India-Myanmar ram pehtlaihnak ramkomh lampi a simi Saisihchuak lam a zoh, Tipi tiang a phan.
6. Thau khua sianginn caah ks. sing 600 bawmhnak a pek.
7. Tikir Dam tuahmi zohfelnak le hunnak a tuah.
8. Tikir le khua kiangkap ah caangdonh lei tuahmi a zohfel.
9. Hnaring khua Myo pekmi lungphun hunnak a tuah.
10. Myanmar le India pehtlaihnak Tipi hlei donhnak ding a zoh.

Motor lawngte in khan 600 renglo Chinram pengkip a tlawng. Kalay-Falam-Hakha-Thantlang, Matupi, Mindat le Kanpetlet tiang a tlawng.

Tutan Vice President Henry Van Thio khuallam ah a rak zultu ramkomh minister le a dangdang zung nih pengkip bawmhnak tampi an pek cio hna. Tangka fang in bawmhnak an pekmi hna hi fiangte in kan hngal kho lo. Thantlang Hotel saknak, Thau sianginn sakremhnak, Hnaring khua caah tiphorhnak motor pahnih tibantuk in a dangdang khua zong tangka fang le thilri in bawmhnak an pekmi an um tiah kan theih.

Atu kan langhtermi pin ah Hakha le Thantlang Khuanu Khuapa nih Vice President sin ah catlap in khua thanchonak caah an halmi tete zong tampi a um. Cu chung in ruahpiak ding, zohfel than ding in bia a lehmi zong an um rih tiah kan theih.

“Tutan Vice President Henry Van Thio a khuallam hi a biapi in Chinram lam le sul zohfel le chekhlat ah a rak tlawn hi a si. Kalay in Chinram a tlawn chung vialte motor lawng te in a tlawng. Tutan Vice President motor bak in a tlawnnak a khuallam hi khan (meng) 600 leng a si. Laitlang lam ah khan 600 khualtlawn timi hi a fawi bak lomi a si. Hi nih hin Chinram le miphun dawtnak taktak a kan ngeih ko timi a langhter” tiah Chin ramkulh Sipin zung in Director Pu Thla Hre nih The Chinland Post ah a chim.+++

Na ruahning rak langhter ve.. (Leave a comment)

%d bloggers like this: