Surkhua Ah Khuangcawi Le Lai Laam Hmuhsaknak In Chin Miphun Ni An Hmang Lai

City Hunter| 2018 February 13| Hakha peng, Surkhua ah kum 70nak Chin Miphun Ni cu khuangcawi le laam a phunphun hmuhsaknak he sunglawi ngai in caan an hmang ve lai tiah kan theih.

Hmanthlak : Surkhua nunphung inn

“Tukum ah tuah dingmi kum 70nak Chin Miphun Ni cu Surkhua nih sunglawi ngai in don le tuah ding in Surkhua Nunphung Phu le Bawi le tlang hna khuakhantinak in an fehter. Hi Chin Miphun Ni ah Chinmi nih kan sunhsak bikmi Khuangcawi laam, Sarlaam, rawlsawmtuk laam hmuhsaknak in caan kan hmang lai. Caan nih a kan pek ahcun laam dangdang zong kan pehtonh te lai. Chuncaw ah Sathluak danghnak kan tuah lai. A dihheu mi vialte cu Surkhua Nunphung Phu chawva in kan liam dih lai, khuanu khuapa re kan theihter hna lai lo” tiah tuanvo ngeitu upa pakhat nih The Chinland Post sin ah a chim.

Chin Miphun Ni le khuangcawi laam hmuhsaknak hmun cu Chin miphun nih kan i ngeihchunhmi Pu Van Kio- Chin Nunphung Inn, Surkhua ah a si lai. Hi Chin Miphun Ni caanhman vialte cu video thlak dih le vawleicung Chinmi vialte sin ah thanhchuah le hmuhter cio khawh ding in tawlrel an timh tiah kan theih.

Atu bantuk in a luancia caan ah Hakha peng, Phaizawng khua zong nih Chin Miphun Ni hmannak le khuangcawi laam hmuhsaknak in caan an rak hman tawn theu. Khuangcawi a muru taktak le a laamning taktak hi Phaizawng le Surkhua nih an thiam bik tiah kan theih.

(Reported by Lklianpum Sk)

Na ruahning rak langhter ve.. (Leave a comment)

%d bloggers like this: