WPC Paih Laksawng Cotu Hna Nih CNF Camp Kawl Thiamsil An Cawkpiak Hna Lai

Tawk Tling Thang| 2019 July 15| July 13, Indiana ah tuahmi avoi 4nak WPC (World Paih Championship) ah laksawng cotu minung 6 nih CNF camp ah a ummi hringtu nule pawl caah Kawl thiamtahnak thiam sil an cawkpiak hna lai tiah kan theih.

Hi kong he pehtlai in WCP paih committee in tuanvo ngeitu upa pakhat nih, “An i paih hlan ah aa pai dingmi zapi hnatlaknak in laksawng comi chung in zuh i laksawng cotu hna min in CNF camp um hringtu le hna Kawl thiamtahnak thiamsil cawkpiak siseh kan ti hna i an cohlan. Laksawng cotu hna sin in kan zuhmi tangka hi $1900 a si. Mah tangka in Kawl thiamtahnak thiamsil cu laksawng cotu hna min te in cawkpiak an si lai” tiah The Chinland Post ah a chim.

Middle Weight World Champion cotu Salai Tial Cung Thang laksawng chungin $400, Tial Uk laksawng chung in $200, middle weight champion cotu Ngun Lin Uk laksawng chung in $300, pahnihnak cotu Lal Rem Ruat laksawng chung in $200, Heavy Weight champion cotu Sang Hlei Thang laksawng chung in $500 le pahnihnak cotu Ram Peng Thang laksawng chung in $300 cio zuh an si. Mah zuhmi a zapi $1900 in Kawl thiamtahnak thiamsil cu CNF camp um hringtu le hna caah cawkpiak an si lai tiah kan theih.

Tutan pound 160 cung a simi Heavy Weight zuamcawh paih final ah Tikir khuami Ram Peng Thang (Dallas Taxes) le Hriphi khuami Sang Hlei Thang (Indiana) an kai i Sang Hlei Thang nih a tei. Cu ruang ah Heavy Weight zuamcawh champion laksawng $8000 cu Sang Hlei Thang nih a co i pahnihnak laksawng $3000 cu Ram Peng Thang nih a co.

Pound 160 tang a simi WPC middle weight zuamcawh paih final ah Chuncung khuami Ngun Lin Uk (Indianapolis) le Hakha Khuathar Lal Rem Ruat (Washington DC) an i pai. An i tluk ngaite, cu ruang ah Naga paih phunglam tangkomh in an paihter hna i Ngun Lin Uk nih a tei. Cu ruang ah Middle Weight champion laksawng $5000 cu Ngun Lin Uk nih a co. Pahnihnak laksawng $2000 cu Lal Rem Ruat nih a co tiah kan theih.

Zatlang champion Victor Van Ceu Ling

Middle Weight World Champion title cu Tial Uk le Salai Tial Cung Thang an i zuamcawh. Salai Tial Cung Thang nih minute 2 tluk ah fawi te in khel hnih thlak in a tei caah Middle Weight World Champion cu Salai Tial Cung Thang nih a co.

Salai Tial Cung Thang nih World Champion laksawng $7000 le Tial Uk nih $2000 laksawng an co. Zatlang bualco cu Victor Van Ceu Ling a si tiah kan theih.

“Tutan paih cu Naga kan unau pawl an i paih khawh than lo ruang ah paih a uartu hna thazaang tampi a zor. Cu ruang ah tutan paih tuahnak caah $9000 kan sung. Asinain, tangka hmuh duh men ah si lo in Lai paih thanchoter duhnak lungput he tuahmi a si caah kan thazaang a chia lo, a phung ah kan ruah ko. Aralaimi November thla zong ah Lai paih thanchoternak ding ah avoi 5nk pehzulh in kan tuah rih lai. Hi tikah cun Naga lei kan unau zong nih a kan telpi khawh cang  lai” tiah WPC committee in tuanvo ngeitu upa pakhat nih The Chinland Post ah a chim.

Leave a Commnet

%d bloggers like this: