ZPBA Youth Civui le Cawnpiaknak Tlamtlingte In An Tuah
Salai Pathawng| 2018 March 24| Thantlang peng, Zophei tlang ah avoi 13nak ZPBA (Zophei Baptist Association) Youth Civui le Training cu hlunghlai ngai in Vuangtu khua ah an tuah tiah kan theih.
Avoi 13nak ZPBA Youth Civui le training cu kumdang nakin a hlunghlai deuh. Kumthum dan ah tuahmi a si i tukum cu hlasak zuamnak in caan kan hmang i hlasak aa zuammi minung 23 an si. Lentecelhnak zong nu he pa he kan tuah i pa volleyball bengh zuamnak ah Zephai B nih pakhatnak le pahnihnak ah Hakha Zophei an si. Nu volleyball bengh ah Zephai B pakhatnak le pahnihnak cu Vuangtu an si tiah tuanvo ngeitu pakhat nih The Chinland Post ah a chim.
Tutan civui ah an tlangtar cu Filipi 1:29 “Khrih caah rian thiah nan si tikah a zumh lei lawng si loin a caah teminnak zong aa tel chih” timi a si. Hlasatu ah sawmmi cu; Lalhmangaihi (Siaha) le Samary Sui Tha Par (Aibur) an si.
Tutan cu hlasak zuamnak in tuah a si bantuk in music lei tumtu zong an sawm hna. Hlasak zuamnak ah Za Ci Sung (Aibur) nih pakhatnak a hmuh i Van Ceu Sang (Zephai B) nih pahnihnak le Van Rem Mawi (Aibur) nih pathumnak laksawng an hmuh. People choice tiah mizapi nih duh bikmi thimnak an tuah than i Za Ci Sung (Aibur) nih a ngah tiah kan theih.
Hlasak zuamnak ah pakhatnak cu Ks.300,000, pahnihnak 200,000 le pathumnak 100,000 an si. Mizapi nih duh bikmi laksawng ah Ks.160,000 a si tiah kan theih.
About The Author
