2018 January 31 Zan Thlapa Thisen Hmelchunh Le Bible Cathiang Bia
The Chinland Post| 2018 February 1| Zahan zan (2018 January 31) zan thlapalai (fullmoon) a langmi nih hmelchunhnak pakhat khat paoh cu a ngeih. Thlapalai zan theng ah dawp nih thlapa a dawlhnak le thisen bantuk in thlapa a sen dihnak he pehtlai in cathiang bia nih zeidah a kan hmuhsak.
January 31 zan Thlapa Umtuning Le Kum 2032
2018 kum January 31 zan ah a langmi thlapalai (fullmoon) cu 2018 kum January thla chung ah avoi 2nak thlapalai (fullmoon) a si. Avoikhatnak cu January 1 ah a si. Thlakhat chung ah thlapalai voihnih aa tong timi hi a har ngaingaimi a si. Zahan zan thlapa a chuakmi bantuk hi a luancia kum 152 lio 1866 kum ah voikhat te a rak chuak bal. Cu hnu ah zahan zan kha avoi hnihnak a chuah a si.
2018 kum ah thlapa dawp nih a dawlh hmasa bik zan zong a si. Zahan zan (January 31) zan kha vawlei le thlapa aa naih bik caan a si caah thlapa kha a nganpi in a langhcaan zong a si. Cu ruang ah Supermoon ti zong in an auh. Cun, thlapa muisam kha asen muisam le darsen muisam in a lang. Muika in suimilam 8:00pm tluk tiang hrawng Thlapa kha dawp nih a dawlh. Suimilam 9:00 hrawng hnu cun thlapa kha fiangte in hmuh khawh than a si. Hi zan thlapa a chuakmi cu NASA nih, “Super Blue Blood Moon” tiah an ti. Vawleicung science lei thiamsang cheukhat nihcun sining phunthum he aa langh caah “Super Blue total lunar eclipse” ti zong in an auh ve.
1866 kum le 2018 January 31 zan ah a langmi thlapa muisam cu 2032 ah a lang/cang than te lai. Hi bantuk in thil a chuahnak a ruang bik cu Nika le thlapa karlak ah vawlei a kal/ aa mer caah a si tiah NASA nih an phuan.
Thlapa Sen Hmelchunhnak Le Bible Cathiang
Zeizong vialte nih anmah le caan cio an ngei cio dih. Sermi thil vialte le vawleicung, vawleitang a ummi thil vialte hi a sawhsawh in an um in an cawlcang lo. Nika le thlapa le vawlei zong hi anmah duh paoh in an um lo. Thil a cangmi vialte hi PATHIAN lamkaltu, PATHIAN thiltum tlintertu le langtertu an si dih. Zahan zan thlapa a langmi le thil umtuning zong nih cawnpiak le ralrin pek a kan duhnak a um hrimhrim ko lai tiah ka zumh. Amah belte, zei bantuk fimchimhnak, cawnpiaknak le ralrin peknak dah an si timi PATHIAN thiltum tu cu kan hngal kho lo.
Hi bantuk thil a cangmi he pehtlai in bible cathiang zohti hna usih.
Joel 2:30-32 ah kan hmuhmi cu, “Cu ni a rat lai nakding hmelchunhnak hna cu van le vawlei ah ka langhter hna lai: Thisen chuahnak le mei le meikhu tlangtlang an si lai. “A lian a ngan i ṭih a nungmi ni, Bawipa ni cu a phak hlanah, Ni cu a mui lai i thlapa cu thisen bantuk in a sen lai. ” “Sihmanhsehlaw Bawipa kha bawmhnak a halmi paoh nih khamhnak an hmuh lai. Bawipa nih a chim bangin, Zion Tlang cungah le Jerusalem khuachung ka khatkhat ah, a luatmi hna cu an um lai. Bawipa nih a thimmi hna cu an nung lai.” Halleluijah!
” Biathlam 6:12 Cun Tuufa nih cakhenh paruknak a phoih kha ka hmuh. A fak ngaimi lihnin a um i ni cu puanchia nak bantukin a nak i thlapa cu thisen bantukin a sen dih.” Amen.
Cucaah, hawidawt, atu kan caan hi hnangampi awk le daithlan awk a tha mi caan a si ti lo. PATHIAN thiltum an tling cuahmah. Cucaah, Matthai thawngtha nihcun hiti hin a kan cawnpiak.
Matthai 24:44 “Cu ruangah cun nannih zong timh cia tein nan um zungzal awk a si, zeicahtiah Mi Fapa cu nan i rin lo caan ah khin a ra ko lai.” Yahshua nih a bia thluachuah kan pekpiak ko seh.” Amen.
A bia tawite kan tialmi a reltu zapi nih ralrinnak le fimchimhnak caah kan i nunpi cio khawhnak PATHIAN nih a thar te in thluachuah kan pekpiak ko seh! Amen.
Biakilh: Hi cabia cu The Chinland Post lungput le ruahnak aa tel lo, catialtu hmuhning le ruahnak a si.
Ref: Biakamfa Mino fb page
About The Author
