CHIN RAM LE CHINMI CAAH PARTY MAW MIPHUN DAH?

?

The Chinland Post| 2018 February 3| 2015 kum harnak kan ton lio ah 2017 tiang ramleng ramchung le cozah nih chim le rel cawk lo in an kan bomhnak hi a ho miphun a ho khua le bu ti hmanh zapi nih kan hngal kho hna lo. Kei hoi cu ka nunchung ah cham khawh ding an si lo. Cu hna lakah kan unau a simi Mizo i an kan bawmhnak tangka hi a tamtuk ve.

Ruahlo piin mincimh harnak an ton ve zong cu theih le hngalh kan si hoi lo. HRC nih bomhnak an kawl i an hmuhnak cazin ka hmuh. Bu nih Cheuhra cheukhat in pekmi lawng a si, pumpak min a um lo ka sia a herh ko. Anmah bomhnak vial ka cohlan i, kei nih unau khat kan si nak ka langhtrer khawh ve lo mi hi ka lung a ka father. Sang upa nih tawlrel hna seh law ka sitawk tein min a um ve hnga ka ti.

Hmailei ah hi nak in bomhchanh a herhmi an um len rih lai kan unau Mizo pawl kan bomh mi hna nak in let hnih in bawmh a herhmi le kan bawmhchanh mi hna cu Chin ram le Chinmi caah a hram a fek, apur, a tlu kho ti lo mi Chin mi kan suttung pi a si hnga mi a si. Hi suttung nih harsatnak phuntling tuar le an nunnak tiang pek in an tuan mi hi a tak in a chuahkhawh lonak caah nihin ni tiangin an kham-khen mi le an tihbik mi an si. A dik ko ti a fiannak cu Thantlang peng khuate hauleng ah CNF/A kan khua ah luh kan duh lo tiah ca an tar ter mi hna khan a si.

Thuk deuh le kau deuh in a ruat lo tu nih Chinmi kan pa le nih ruah setsai lo in Pinlung cahren an tuah mi kha sal kan cannak tu a si tiah ca an chuah. Ram daihnak cah an rak thlah mi Rev.Sang Awi (tlei cia) a tlun ka te ah bia ka va hal i a ka lehnak cu Aung San le na pa le nih Pinlung cahren an rak tuah mi a tak in a chuah khawhnak caah an thisen tiang a luannak hi a si a ka ti, ka lung hna a ka ngamter.

Mah cu FEDERAL a si. Kawlram ralkap cozah nih an rak tihmi hna cu ramtang um Chin mi kan suttung pi hi an si. An si bantuk in ramchung ummi nih kan tih kan huat ve mi hna cu ralkap cozah kha an rak si ve. A dik mi a si ko hi capar hi a tawi khawh chung a biapi mi le a herh taktak mi lawng in ka tial mi an si. Careltu nih rak pehtonh cio ko u mu. Caan le thil sining a hun i thleng i USDP cozah an kai ah khan ralkap bawizik a si ve mi Thein Sein cu Tamadah ah a hung cang.

Thein Sein nih cun tlangcung hriamtlai pawl he remdaihnak min an tial hnu ni rau lo teah mithi le minung an i ton than bang kum 20 ring lo chungkhar he nung nain aa then cio mi kan fanau hna cu kan mitthli rual he hmurka siloin Hakha zaatlang lam tlum loin kan don hna ni kha philh khawh loin Laimi tuanbia sung a rung si te lai.

Mitthli rual he lawng siloin baleu sumsal le muko laihla lailaam le hlaremhnak he kutzatial tlaih in kan don mi hna kha kum tampi rawltam tihal harnak phunkip tuar in le an thisen tiang chin ram le chin miphun cah a rak luang i an chuahkehnak ram le nupa sinah a hung kan phan than kho mi hna kha Party an si lo. Ram le miphun cah a tuantu CNF/A an si kha lungfim cio awk kan si. Laimi kan Pathian hi a tha tuk, kan khua ah lut hlah uh kan in duh hna lo an rak ti mi hna kha Hakha Pyidaungsuh khualbuk Vuanci reng asi mi lawng nih ih zau nak ah Chin Vuanci pawl he bia phunkip an rel ti ve cang.

Hi zong hi Chin ram cu Chinmi kut ah zalong herzang tein a um te lai nak a si ko hnga lo maw? Hi hna bawmchan tu hi a bik in Thantlang peng mi an si bantuk in harsatnak, hremtuarnak a ing cang mi zong an si fawn. Remdaihnak min an tial hnu Chin ram ah Muka tualbuk tein khua an sak i eidin an harnak le Thantlang peng nih an bawmhchanhnak hna CNF/A nih an chimmi a dik mi a si ko.

Aung San nih party in Pinlung conference a au lo. Miphun in a rak auh i an bia a tlamtling colh ko. A fanu Suu Kyi nih Miphun siloin Party in a auh ve i voihnih Conference pi an tuah cang nain tlangcung mi nih an tumtah bik mi Federal a mui a de rih lo. A ruang cu Party a simi NLD Cozah le Cozah a rak si ve mi USDP a tlangpi cun ralkap bu le Kawl mi bu ti usilaw kan palh tuk lem lai lo. Miphun in pakhat hmanh telh lo a si cah Party cu an party cah tuan phung a si bantuk in miphun zong cu a miphun cah a tuantu zungzal an si.

Pyidaungsuh Cozah a can khawh nak zong cu Party siloin Miphun a si mi Chin, Kachin, Shan nih min an tial nak thawng in a si ko. Cu ve bang in Chin ram ah hitihin hanchonak te te a hung lut mi vialte hi a ho party le pumpak hal nak thawng hmanh in kan hmuh mi a si lo. Kanmah CNF/A le Cozah min kan tial hnu in a chuak mi lawngte a si tiah Col. Solomon nih Hakha Post ah a chim. Chin National Day zong a fiang tuk.

Ka bia ka hren cang lai. Chin ram le Chin miphun nih zalong duhdim tein Nuhrin Covo Federal Uknak hi an nunnak pek in nihin ni tiang raltha tein a dir a chim ngam mi cu party an si lo. CNF/A hi an si ko cah Chin mi zapi nih hngalh ve in an thaithawh le an zanriah tal cu Cozah a silo mi Hakha mifim luban ah sermi hna siseh, biaknak lei in a kan hruaitu nih khua le ram miphun zawnruahnak he tawlrel khuakhan in mah le si khawh tawk cio in pek le bawmhchannak hi kan tuah pi ve cang hna sehlaw Chin Miphun suttung nih nawl ngei luban ah an cang kho lai i ram kip um kan fanau hna fim ngeitu zong kan ram par ter tu ceu ter tu ah an cang kho dih ko lai ti ruahchannak nganpi he ka tial hnawhchan bik cu a si.

Pu Khua Kung,
Hakha Khuahlun

 

Biakilh: Hi cabia cu catialtu pumpak hmuhning le ruahning in tialmi a si.

Leave a Commnet

%d bloggers like this: