Thailand Prime Minister Thar Thimnak le Ramkhel Sining
Salai Mangpau | July 26, 2023 — Kan hnu, May 14, 2023 Thailand ah rampi thimnak (General Election) tha tein lim a si cang, nain July 26 tiangah Thailand ah Prime Minister an thim kho rih lo. Thailand thimnak ah thimfung tambik cotu Move Forward Party (MFP) le phukom pasarih nih Pita Limjaroenrat caah vote 324 lawng a tin co caah cozah an dirh khawh rih lo nak hi a si.
Parliament ah MP dihlak 750 an um. 2017 Phunghrampi ning in cun, Prime Minister (PM) thimnak dingah hin Parliament House pahnih in MP 750 nih Vote thlakin thim ding a si. PM tling ding in Vote 376 hmuh a hau. Thailand PM thimnak zong cu 27 July ah tuah than a si lai i, Move Forward Party in cuh khawh a si ti lo caah 8 Parties Coalition-MP +312 aiawh in Pheu Thai Party (PTP) in Ms. Paetongtarn Shinawatra silo ah mirum Tycoon Sretha Thavisin hna nih an i cuh kho i, tutan hi Coalition Partner pawl PM i cuh khawhnak a donghnak bik a si cang. Tutan hi Ralkap chiahmi Senators (phungsertu) tam nawnte nih kan in bomh hna lai an ti pinah lailak Party 5 in MP 6 nih kan in Vote ve hna lai tiah bia an kamh hna nain Thailand Political Analyst pawl nih cun tling maw, tlinglo maw an si lai ti ah an tuak ning a si. PTP Coalition pawl tling hna hlah sehlaw zeitin dah a si lai.
Move Forward Party Lutlai Pita Limjaroenrat
Amah hi 5 September 1980 (42) Bangkok ah a chuak i, Nupi Ms. Chutima Jeepanart le fanu Pipim Limjaroenrat a ngei. Thamasat University in BBA (Business Administration) Bangkok in a dih hnuah Vawleicung minthang tak Harvard University ah MPP hnu ah US, Massachusetts Institute of Technology in MBA a dih than. A Nu le Pa chungkhar hawikom nih “Tim” tiah an auh tawn. Zeipoh si sehlaw, Thailand ah Mipi Uknak Democracy diktak kalpi dingin Thailand Mino nih ram hruaitu dirhmun ah an dir khawh mi cu lawmhpi awk tak tak an si.
MFP Leader Pita Limjaroenrat hi Future Forward Party (2018) in MP a si lio ah a Puaisa/thil neihmi EC sinah details report a pe duh loh tiah PPR Party MP Ruangkrai Ledkitwa ttana nih EC ah Complaint a tuah.
Pita Limjaroenrat hi a Pa nih a roh tami Thai ah a lar tak takmi I-TV Company a ngei i, Thailand mirum tampi nih Share Holder/Stocks Markets (SET) caah an hman bikmi asi i, 2014 ah Baht 20.5 million in an rak dirhmi a si. Cucaah a dir hmun hi Thailand ralkap lakah thinphang dailo a si ko. PM tling sehlaw, Myanmar ram mipi ca zongah US he tuanti in ralzaam bawmhnak, remdaihnak siam khawh ka zuam lai tiah a chim.
Thai Prime Minister thar kong, Prime Minister thim dan
Atu lio thimnak ah thutdan tam bik acotu pa zong fawi tein Prime Minister a si kho, Prime Minister dang pakhatkhat zong a si kho, a cozah fawi te in ser khawh a si kho, ser khawh lo zong a fawi te. Zeicatiah?
- Thailand ram i rampi a lu bik cu Siangpahrang a si, a cozah a lu bik cu Prime Minister a si. Hluttaw pahnih a ngeimi ram a si.
- Hluttaw pakhat simi House of Representatives ah chungtel dihlak MP 500 an um. 400 hi Myanmar ram bang thimmi an si. 100 hi party list in. A dang hluttaw cu Senate ti a si i chungtel 250 an si. Senators hna cu a tawinak in ralkap nih thimmi an si tiah an ti ton hna (senate chungtel bak ah telh lo a ngah lomi ex-officio hna cu “Supreme Commander-in-Chief, Army chief, Navy chief, Air Force chief, National Police chief, and Defence Ministry permanent secretary.”
- Thimnak ah thutdan 25 a hmumi poh nih Prime Minister caah minung pathum cio chuahpinak nawl an ngei.
- Prime Minister caah MP a si lomi zong min chuahpi khawh, thim khawh a si. (State level ahcun MP a tlingmi chung long in thim khawh a si. Chief Minister caah Myanmar cu President pi tu cu MP a si lomi zong thim khawh a si tik ah kan buai huam lem lo).
- House of Representatives chungtel 500 le Senate chungtel 250 chungah vote 376 a hmumi pa/nu cu Thai Prime Minister a si lai.
- Atu sining zoh ahcun Pita hi Prime Minister a si kho rih lo. Harnak a ton. Atu hi Party pa 8 fonh in a cozah ser an i tim. Cu party hna cu: Move Forward, Pheu Thai, Thai Sang Thai, Thai Liberal, Prachachart, Fair, Plung Sungkom Mai, and Peu Thai Ruamphalang parties tiah the Nation thawngzamhnak nih langhter.
- Hi party pa 8 fonh ah a dihlak MP thutdan an tincomi hi 313 a si. 376 a tlinnak ding caah MP thutdan 63 an herh. A tawinak in a cozah ser khawhnak caah siseh, Pita cu Thai Prime Minister sinak caah MP vote 63 a herh.
- Senators chung in ruahchannak a tlom ngai. Ralkap nih hun chuahpi mi, Ralkap dirpitu senators si hna kaw, a dang party lei nih an hun zuan hnawh duh chap hna lai maw timi hi biahalnak a um fawn.
- Prime Minister thar a kai tikah “Bamboo policy” Rua Policy ning in maw Thailand hi a kal rih lai?
Thailang thimnak ah PR system
Thailand Siangpahrang uknak le ralkap hruai mi Semi-Democracy uknak remh than a duhmi le mipi uknak kalpi a timmi Move Forward Party (MFP) le Pheu Thai Party (PTP) nih PM tuan liomi General hlun Prayut Chan O- cha hruaimi United Thai Nation Party le ralkap tanhmi Party hna an si.
Tutan thimnak ah hin mipi vote thla khomi millions 52 lakah Mino thong tampi nih thimfung an thlak caah votes thlak dihlak 75.22% a si.
Thailand thimnak hi PR system an hmang caah Move Forward Party nih Popular Votes 14.1 million, MP 113+ 39 = 152 (Party List Seats), Pheu Thai Party nih 10.8 million, MP 112+ 29 = 141 Seats le PM kal ding Prayut hruaimi UTNP nih 4.7 million, MP-23+ 13=36 le Dy-PM ex-Ralbawi hruaimi Palang Pradorata Party nih MP-39+1=40 an hmuhning a si.
A donghnak ah,
Thailand hi Siangpahrang hruaimi asiloah, Siangpahrang he neihniam le amah lei tang ralkap bu nih voi 13 leng “Anna-ting” (Coup) an rak tuah cang leng ah Siangpahrang uknak hrawh an timh tik poh ah a chuak tawn. Tutan MFP le PTP zong nih Thai Kingdom hruainak hi phunghram thar siam in nawlneihnak thumhpiak an timh ve mi a si. Cu pinah, Thailand ah hin 2017 Constitution an ser thar mi ning in, House of Representatives ah MP 500 an um i, thim tak takmi cu 400 an si i, 100 cu Party List Seats in hmuhmi (PR စံနစ်) a si.
Thai Siangpahrang le ralkap lei ralkah phu Opposition Party ngan bik Bhumjaithai Party, asilo ah pumpak Independent in PM an i cuh lai i, MP 181 an um caah Senators- 250 nih an Votes hna ah cun an tling kho ve mi a si hoi.
Amah belte mah hi zong sikhawh dawh a si lo ti ah mithiam pawl nih an tuak than. House Speaker Mr. Wan Muhammad Noor Matha nawl neihnak a si cang lai i, a herh a ti ah cun PM hlun Prayuh Cha-O-cha (Ralkap General, 2014 nawlngeihnak latu) cu kum khat chung Care-taker cozah in uknak nawl a pek kho, silo ah Siangpahrang nih Parliament cu an hnon (dissolve) kho i, thimnak thar an tuah than lai. Cu bantuk a chuak sual ah cun, Move Forward Party hruaimi mipi nih phunhrampi Article 272 ning in ralkap cozah nih mipi thim lo “Senators-250” a chiahmi kha hrawh than ding in Lamzawhnak biatak thlakin nei dawh an si caah Myanmar bantukin Thailand ram zong hi an buai lai lo tiah chim awk an tha lo tiah an purdah.
Mah belte PM kal ding Prayut nih cun buainak um lo tein kalti hna usih tiah MFP Pita Limjaroenrat nih a chim.
CC;
1.Thawng Za Pum, Thai Prime Minister thar kong
2. MC Biklian, Thailand PM thimnak dingah PTP a donghnak,
3. https://en.wikipedia.org/wiki/2023_Thai_general_election]
4, https://www.csis.org/analysis/2023-thai-election-results-opposition-win-unclear-path-ahead
About The Author
