2019 Kum Ah US Nih Malaysia Ralzaam 3500 Hrawng Laak A Timh Hna

City Hunter| 2018 June 5| US cozah nih 2018 kum nak tamdeuh in 2019 kum ah Malaysia ralzaam 3500 hrawng laak a timh hna tiah Malaysia IOM (International Organization for Migration- IOM) zung ah riantuantu pakhat sin in kan theih.

Hi kong he pehtlai in Malaysia ah Malaysia IOM zung ah riantuantu Eric Van Kung nih ralzaam laaknak kong he pehtlai in a facebook i aa tarmi kong ah The Chinland Post nih pehtlaihnak kan tuah i atu bantuk in a chim.

“US cozah nih 2018 kum caah Malaysia ram in ralzaam 1,500 hrawng laak ding in timhtuahnak a ngeihmi chung ah 2018 January in May tiang ah 593 hrawng an kal kho cang. Atu hi minung 907 hrawng an taang rih. Tukum nakin hmaikum (2019 kum) ah US cozah nih Malaysia ralzaam tamdeuh laak ding in timhtuahnak a ngei. Ralzaam 3,500 hrawng laak a timh hna tiah kan zung riantuantu pakhat nih a kan chimhcia chung.”

“2018 kum January in May tiang US a kal cangmi Malaysia ralzaam cu; Chin ralzaam chung in minung 290, Rohingya 244, a dangdang tlangcungmi 59, an zapi 593 an si. A kal dingmi 1500 chung ah a taang rihmi hi 907 an si” tiah a biapeh ah a chimchap.

Eric Van Kung hi Malaysia IOM zung ahhin kum 5 hrawng rian a tuan cangmi a si. Atu hi Malaysia IOM zung ah Interpreter a tuan lio a si. Laitlang a khua cu Thantlang a si, a nu le a pa hi Farrawn an si. Malaysia hi 2010 ah a phan cang.

Malaysia ralzaam hi Newzealand, Canada, Australia le Japan nih an laak hna. Australia nihhin 202 Visa in tambik a laak cang hna. Canada le Newzealand hi an laakmi hna hi middle east deuh an laak hna. Canada hi kumkhat ah minung 70 in 100 kar hrawng a laak hna. Newzealand hi kumkhat ah minung 30 in 50 kar hrawng a laak ve hna tiah kan theih.

Chin ralzaam hi Malaysia lawng si lo in India zong ah tampi an taang rih. India lei ralzaam hi Malaysia tluk in an laak ti hna lo caah ramchung ah a kirmi zong an um pah cang kan theih.

Na ruahning rak langhter ve.. (Leave a comment)

%d bloggers like this: