Hakha Le Zokhua Kar Ah Phungki Thil Aa Hrukmi Pa Nih Kum 16 Ngaknu A Tlaihhrem
City Hunter| 2018 June 5| Hakha le Zohkhua kar khan (meng) 17 ah phungki thil aa hrukmi tlangval no pakhat nih kum 16 hrawng a simi ngaknu pakhat a tlaihhrem. A tlaihhremtu pa cu phungki thil he a tlaihhremnak hmun ah palek nih an tlaih tiah kan theih.
Hi kong he pehtlai in Zokhua Khuabawi Pu Ceu Hnin cu The Chinland Post nih pehtlaihnak kan tuah i atu bantuk in a chim.
“A tlaihhrem hi June 1 zan ah a si. A tlaihhremtu pa hi mah ni ah Zokhua zong a phan, a kir lei ah khan 17 inn ah a riak. Rawlchuantu ding ah an laakmi kum 16 hrawng ngaknu te cu, cu zan le a riahnak inn ahcun phungki thilthuam aa hrukmi tlangval no nih cun a tlaihhrem. A tlaihhremtu pa cu a thaizing ah a tlaihhremnak inn lila ah palek nih a phungki thilthuam he an va tlaih. A thilthuam cu an phoih ngam lo i Rungtlang phungki bawipa an chawnh hmasa i sualnak a tuah si cun a thilthuam cu rak phoih ko uh a ti hna hnu lawng in a thilthuam zong an phoih. Atu hi Hakha thonginn ah an thlak ko. Chungkhar lei nihcun ahmuh an tuah lo.”
Hi kong he pehtlai in Hakha palek zung in Sakhaanhmu U Thein Zaw Oo nih, “Thil a can hi June 1 deihlan deuh ah a si. Palek nih thawng kan theih cangka kan va kal i kan tlaih colh. Amah hi Maung Win Thu Aung, kum 28 a si. Tlaihhremnak pohmah 376 in ahmuh kan tuah. Atu hi ahmuh kan chek liopi a si, biaceih zung nih zeitik ahdah bia an khiahpiak lai te lai le zeitindah an khiahpiak te lai cu chim awk a tha rih lo” tiah The Chinland Post ah a chim.
“Rawlchung ah an laakmi ngaknu he Magwe ramthen, Kyaw lei in a rak rami, Kawl a si. Cun, a tlaihhremtu pa zong hi ka hngalhmi a si lo nain Kawl a si ti tu cu ka hngalh. Hakha le Zokhua kar lampi cung ah lam riantuantu hi minung 50 hrawng an um. Khan 17 ah phu khat, khan 18 ah phukhat, khan 19 ah phukhat tibantuk in a phuphu in bawk i tom in khua an sa. Lam riantuantu hi Kawl deuh lawngte an si” tiah Zokhua Khuabawi Pu Ceu Hnin nih a biapeh ah a chimchih.
About The Author
