2023 Chung Ah Ralkap Phu Nih Minung A Phu In Voi 86 A Thah Hna
The Chinland Post | 2024 January 5 — Kumkhat chung ah hramhram in uknak a latu ralkap phu nih minung 5 nak tam kha a phu in voi 86 a thah hna i Sagaing ramṭhen ah voi tam bik a cang tiah NUG kuttang nuhrin covo zung nih an thanh.
A luancia 2023 January in December thla tiang nuhrin covo buarnak he pehtlai in an khawmhsuat mi a si i a fek mi thawngzamh pawl kherhhlainak, Online Monitoring hna in nuhrin covo buarnak voi 4,656 an khawmhsuat khawh.
Cun a hmunhma ah zohfelnak tuah hnu in fehter khawh mi nuhrin covo buarnak voi 657 an khawmhsuat khawh leng ah cu chung ah biahalnak, hmanthlak telh in thilsinng ṭha tein fehter khawh mi voi 322 a um i The Independent Investigative Mechanism for Myanmar (IIMM) le vawlei cung ram kip sin ah thilsining 165 an kuat khawh tiah theih a si.
Cubantuk a phu in minung thahnak chung ah a fak bik hi Sagaing ramṭhen, Kanbalu pengkomh chung, Pazigyi vanlawng kahdohnak a si i mipi 157 a phu in an thi.
Cun October 9 le 10 ah a cang mi Kachin ram, Munglaikhat khua le ralzaam camp hmun 2 cu a ruang um lo in kahdohnak a si i a thi mi 30 an um.
Myanmar ram pumpi, 2023 chung ah nuhrin covo buarnak hi Sagaing ramṭhen ah voi 344, Magway ramṭhen ah voi 98, Mandalay ramṭhen ah voi 72, Bago ramṭhen ah voi 29, Yangon ramṭhen ah voi 23, Chin ramkulh ah voi 21, Taninthary ah voi 17, Karen, Karenni le Shan ram hna ah voi 11 cio, Kachin le Rakhine ram ah voi 10, Mon ram ah voi 7, Irrawaddy ah voi 2 le Naypyitaw ah voi 1 a cang tiah an khawmh khawh.
Cun kumkhat chung ah phungning lo in thah mi 1,342 an um i a thi mi chung ah pa 877 an i tel tiah an langhter fawn.
NUG nuhrin covo phu nih mipi caah tlukruannak, daihnak le zauk phung a lennak hnga ralkap nih a buar mi sualnak pawl hi ṭha tein kan tawlrel lai tiah cathanh ah an langhter.
About The Author
