Kanan Khua Bomthlaknak Ah A Thi Mi An Karh Kho
The Chinland Post | 2024 January 8 — Khampat khua pawng, Kanan khuate bomthlaknak ah hngakchia 2 telh in mipi 11 an nunnak a liam i minung 11 hliam an tuar tiah theih a si.
Kanan khua cu ralkap lei nih 2024 January 7 zinglei sml 11:30am hrawng ah vanlawng in bom an thlak caah minung a tam deuh hi a hmun ah an thi.
Cubantuk bomthlaknak ruang ah mipi an thih leng ah mipi inn 10 leng, sianginn le biakinn pawl zong an rawk tiah khuami hna nih The Irrawaddy ah an chim.
Kanan khuami pakhat nih “Kahdohnak zeihmanh um lo pi in an rak thlak. Cubantuk in a thlak ruang ah hngakchia 2 le upa 9 tiah an zapi 11 an thi. A thlaknak hi Kanan khua, No. 5 sang a si. A thlak mi bom hi 250lb a rit mi bom lung 4 a si. A hmun ah minung 11 an thi. Ruak si lo in, taksa aa ṭhencheu mi zong an um. Ruak a tlau mi hi an tam lai. Cun hliam a tuar mi hi 15 nak tlawm lo an um. Hliam a tuar mi chung in thinphang a si mi zong an um. A thi mi an karh kho” tiah The Irrawaddy ah a chim.
Ralkap lei nih atu bantuk in bom an thlak hi Khrihfa mi pawl kan i pumh caan Zarhpi ni ah a si caah a thi mi an tam khunnak hi a si tiah khuami hna nih an chim.
Kanan khua hi Tamu peng, Khampat khua dih in a ngan bik khua a si i inn 2,000 hrawng khuasa an si. Khampat khua hi PDF nih 2023 November thla chung ah an lak khawh hi a si.
About The Author
