CDM” Teinak Hriamnam Le Lungput (Part-1)
Salai Mangpau | July 17, 2023 |
“Myanmar ram ah Ralkap nih uknak hramhram in an lak mi kong ah duhlonak a phunphun in langh ter cio a si.”
- CDM Sullam
- CDM Sullam
‘Civil” sullam cu “Mi zapi”, Disobedience” sullam cu “Nawlbuar”, “Movement”
timi cu “cawlcanghnak” tinak a si. CDM a sullam taktak cu,“Uknak thalo tang ah mi zapi nih nawlbuar cawlcanghnak tuah i cozah zung kai duh lo, cozah rian fial mi zong tuah duh lo, tax (ngunkhuai) zong pek lo, sianginn zong kai duh lo in uknak thalo an duhlonak kha a phunphun in langhter cawlcanghnak” kha langhter duh mi a si.
- Hmasabik CDM
USA uknak a that lo lio ah uktu thalo duhlonak le cawlcanghnak a rak chuak. Cu cawlcanghnak cu “Civil Disobedience Movement” ti a si i, Khrihfa zumtu a simi Henry David Thoreau (1817-1862) nih 1849 ah a rak thawk. A dirpimi cu, “A dik lomi, mi zapi hremnak le salzuatnak caah zalonnnak a hrawktu le a khamtu caah an tuah mi phunghram le phunglam le upadi vialte cu zulh lo ding, buar ding le hrawh ding” timi kha fakpi in a rak aupi.
- India Ram Cawlcanghnak
CDM cawlcanghnak bantuk he aa lo mi cu India ram ah Mahatma Gandhi (1869-1948) nih 1930 ah “satyagraha” ti biafang hmang in cawlcangh hram an rak thawk. Hi biafang nih a langhter duhmi cu, “Biatak thlarau na ngeih mi nih uktu thalo tang ah tel lo ding in um kho lo in fial (Soul-Force), biatak na hngalhmi nih biatak dirpi ding ah um kho lo in fial (Truth-Force), daihnak caah hriamnam tel lo in uktu `halo nawlbuarnak in dohnak”(fighting with peace), biatak na dirpi ruangah harnak le thongtlaknak um ko bu zong ah biatak i tlaih peng (holding the truth)” ti bantuk in sullam a phunphun a ngei. Jesuh Khrih nih Johan 8:32 chung ah, “Biatak kha nan hngalh lai i cu biatak nih cun an luatter hna lai” tiah cawnpiaknak kha hram a bunh. Mahatma Gandhi nih a langhter duh mi cu, “A dik lo mi cozah uknak he zeihmanh tuan ti lo ding, zung kai lo ding, sianginn zong kai lo ding, rian zong tuan ti lo ding, fial mi tuan lo ding le ngunkhuai zong pek lo ding” tiah a cawnpiak hna. Hi cawlcanghnak nih India cu mirang uknak (British Monopoly) in luatnak a pek hna.
- Myanmar Ram CDM A Thawknak
Myanmar ram tuanbia zoh tik ah ralkap nih uknak hramhram (damiah) in voi (3) tiang an lak (1962 ah General Ne Win, 1988 ah General Saw Maung le 2021 ah General Min Aung Hlaing). Hramhram in mi a uktu, ralkap nih mah pumpak nawlngeihnak le rumnak ah meithal he mipi hlen, tlaih, le thah hna hi an si. A donghnak ah kawlram cu vawlei cung ram sifak bik ah a canter. February 1,2021 ah hramhram in nawlngeihnak an lak tik ah mi zapi rungventu, palik le ralkap cu damiah le mifir bantuk in kan hmuh hna caah mi zapi nih tihnak in an khat.
Humhimnak a um ti lo. Cucaah ram chung ram leng mi zapi nih ralkap uknak thalo tang ah zung kai lo ding, an fial mi nawl zulh lo ding, sianginn kai lo
ding le mi zapi nih tax pek lo ding (Civil Disobedience Movement (CDM) cu cawlcangh hram an thawk i teinak kan hmuh hlan lo pehzulh ding in timtuahnak ngeih a si.
- CDM Cu Khrihfa Rian A Si
Khrihfami nih biatak kan i cawnpiak mi cu, “Mithalo hna khuakhannak ah aa tel lo i misual hna lam zong a zul lo i Pathian a nihsawh mi hna sin ah a ṭhu lo mi cu thluachuakmi an si (Salm1:1)” ti hi a si. Langhter duhmi cu, “Biatak dirpitu hna cu uktu thalo hna tang hrimhrim ah dirpitu le bawmtu an si bal lo” ti kha a si. Nihin kawlram pumpi nih kan ton mi ralkap uknak thalo tang ah Khirhfami hna nih fakpi in kan i cawnpiak a herhmi cu, “Ralkap uknak tha lo kha dirpi lo ding, zung riantuan lo ding, sianginn kai lo ding, mei man zong pek lo ding kha ral tha tein kan tuah ding a si. Khrihfa zumtu tha taktak cu, “Biatak kha raltha taktak in a dirpitu le cawnpiaktu ka si” ti kha philh lo ding le dirpi peng ding.
“CDM” Lungput hna (Part-2) pehṭhan ding…
About The Author
