A Nikhatnak Tanghra Camipuai Cu A Tluang Nain Chinram In Minung 1576 Camipuai Phitlo In An Bau
City Hunter| 2018 March 7| 2018 March 7 in thawkmi Myanmar rampi tanghra camipuai a nikhatnak cu a tluang nain Chin ramkulh in siangngakchia 1574 cu camipuai phit lo in an bau. Ramkulh le ramthen vialte lakah camipuai phit lo in a bau bikmi cu Chin ramkulh a si tiah kan theih.
March 7 ah thawkmi Myanmar rampi tanghra camipuai a phi dingmi zapi hi 844,358 an si i a nikhatnak camipuai a phimi zapi hi 788,863 lawng an si. Myanmar rampi huap in camipuai phit lo in a baumi zapi hi 55,495 an si. Hi chung ah camipuai phi ding a si ko nain a nikhatnak Myanmar major phit ni ah zatuak (%) in a bau bikmi ramkulh cu Chin ramkulh a si. Chin ramkulh in minung 11741 a phi dingmi chung ah 10167 lawng an phi, siangngakchia 1574 an phi lo. Chin ramkulh in siangngakchia a phi lomi zatuak hi 86.59% in an tlawm bik. A chang tu ah Rakhine ramkulh an si, 87.78% lawng nih camipuai an phit i a phi lomi hi 5453 an si.
Hakha IPRD nih an langhter ning ahcun Hakha khuapi chung ah tanghra camipuai phitnak hmunthum ah an tuah. No.1 Siangsangrun ah minung 865 a phi ding an si nain 802 lawng an phi. No.2 Siangsangrun ah minung 426 a phi ding an si nain 358 lawng an phi. No.3 siangsangrun ah siangngakchia 734 phi ding an si nain 646 lawng an phi. Hakha ah tanghra camipuai phi ding siangngakchia zapi hi 2025 an si nain 1806 lawng an phi tiah an langhter. Cu ning in tuak tikah Hakha in siangngakchia 219 camipuai phit lo in an bau tiah theih khawh a si.
March 7 ah tuahmi Myanmar major cu Hakha, Thantlang siangngakchia nih an phi kho maw ti kan hlat tikah kan halmi siangngakchia paoh nih kan phit khawh ngai ko tiah an kan leh cio.
Cun, Hakha siangcachimtu pakhat zong nih, “nihin Myanmarsa question cu a har lo. Keimah ka hngahnak khaan siangngakchia cu an phi kho dih ngawt. Tukum cu ca aa firmi hrimhrim ka hmu hna lo, kumdang he aa dang tuk cang. Thaizing belte an phit dingmi English belte hi zeidik an lawh cio te hna lai” tiah The Chinland Post ah a chim.
Tukum March 7 in tuahmi Myanmar rampi tanghra camipuai cah ca aa firmi le zulhphung a buarmi paoh cu kumhnih baar (kumhnih camipuai phitnak phih) an si lai tiah Myanmar rampi fimcawnnak zungpi nih an thanh.
Biakilh: Hmanthlak langhtermi hi nihin Hakha ah tanghra camipuai a phimi hmanthlak an si.
Ref: Ministry of Education, Myanmar, Hakha IPRD
About The Author
