June 22, 2024

Thong Inn Zunput He Aa Lomi Hakha Sii-inn Pa Zunput

0

Salai Ngun San Aung| 2018 March 7| Chin ramkulh khuahlipi cozah sii-inn pi ah pa ca an tuah mi zun inn cu zu thol le luannak a um lo ruang ah aa dil mi zun le ek in a khat.

Hakha sii-inn ah pa zunput

Hmanthlak chung in hmuh khawh a si bantuk hin minung nih hman mi zun inn he zong aa lo khawm lo. Zun inn ah hin ek nak pathum an tuah i pakhat cu tawh hrenh a si caah pahnih lawng hman khawh a si. Cu zong nih ti a um lo caah a car pah i a rim chia tak tak mi zun le ek thing aa dil mi in a khat. Cu nak in zoh ah a rem lo tak tak mi cu zu le beer thawl tam lak te hmuh a si mi hi a si. Kan dam lo i sii-inn kan panh, kan chungkhar unau nu le pa kan cawng hna i sii-inn kan um chung tal zong zu ding kan i sum kho hin rua lo. Zoh ah lung zong a fak i ning zong a zak.

Hakha sii-inn ah pa zunput a thurhnom ning

Cun zunpi zun nak leng ah zunte zung nak pahnih an tuah nain a pahnih tein zun kal nak ding tipep an tuah mi a rawk cang i zun cu aa dil thup ko. Ti zong a um lo, hi zun inn ka va zoh lio ah ngakchia pa kum 13 hrawng tluk a si lai, zun inn chung tuang lai pi ah a zunte a rak zung ko. Zun nak an tuah mi cu zun aa dil mi in a khah cang caah cu ka a leng i a zun cu si dawh a si. Cu a zunmi cu ti toih awk hlei zong a um fawn lo. Cuticun sii-inn zunput lawh loin Thong-inn zunput tu a lo ai.

Hakha sii-inn ah pa zunput a thurhnom ning

Sii-inn ah mizaw a cawng mi pa upa pakhat nih, “Hi leng ah hin a dang pakhat khat lei ah khin an kan tuah piak nain cu zong ti a tam lo lengah minung kan tam, khan thum te lawng a si i zun te zung nak a dang te an tuah mi a um lo tikah kan i daih lo. Hika nan hmuh mi hi a thur hnawm cu nan mithmuh hi a si ko. Asinain hmun dang hlei ah zun nak a um lo. Ti hi a that lo le hman awk tha lo a si ahcun inn hi an hrenh awk zong a si. Cu nak in a biapi deuh mi tu cu Cozah lei zong nih an kan zoh piak i ti an kan tlangtlak piak awk ah ka ruah. Cun khat lei ahcun kanmah mizapi hrim hrim dingrep kan ngei lo tuk i a hlei in zuu le beer thol a um mi te hna hrim hi cu ngaihchia kan si” tiah a chim.

Hakha sii-inn ah pa zunput a thurhnom ning
Hakha sii-inn ah pa zunput ah beer dur le zuu palang pawl an chiahmi

Hi kong cu Hakha sii-inn uktu kan hal hnik nain kan ton kho lo. Sii sayama te kan hal hna tikah sii-inn kong he aa pehtlai mi cu kannih chimnak nawl kan ngei lo. Sii-inn uk nih chim a kan ti lawng ah chim ding kan si an ti caah anmah lei hmurka kan tong kho lo.

About The Author

Na ruahning rak langhter ve.. (Leave a comment)