Australia Senator Nih Chin Ralzaam Kong Ah UNHCR Ca A Kuat

Senator Dean Smith

The Chinland Post| 2018 June 22| Australia ram in Senator Dean Smith nih Chinram le Chin ramkulh ah nuhrin covo a um lonak kong le nihin ni tiang Chin Ramkulh ah zalennak taktak a um lonak kong cu UNHCR zungpi, Geneva ah ca a kuat.

“Ca a kuatnak a ruang bik cu UNHRC nih Chin ralzam sin ah nan kir a hau cang timi thanhnak an tuahmi he pehtlai in a kuat cu a si” tiah Renny Ceu Lian Mang nih a chim.

Australia Day an hmanpi lio

UNHCR zung nih Chin ralzam cung i biachahnak an tuahmi a bik in Chin ralzam pawl Chin Ramkulh ah kirter dingmi kongah a lungtlin lonak, a duhlonak le nawlnak ca a kuat hna tiah theih a si.

A cakuat ah a langhtermi cu, ‘Keimah mit hmuh hrimhrim in Chin ramkulh ka phan. Khuate tiang ka kal. Chin ramkulh ah nuhrin covo, minung nunnak ah a hrampi a simi herhhai, Biaknak lei ah zalonnak tbk. a um lonak ka mithmuh a si. Hmaikum January 2019 zong ah keimah lawng silo in, Australia ramkhel tuahtu MP, Senator pawl he tlawn than kaa tim’ tiah a pumpak dirhmun in Chinmi kong ah UNHCR zung Geneva ah ca a kuat.

“UNHCR zung nih Chin ralzam pawl lam nan hunpiak nakhnga ding a biapi. A herh rih. An ram kir than ding ah thinphannak dirhmun a si rih tbk. amah pumpak hmuhmi kong le Chinram ah zalennak a um lonak kong a tialmi cu Senator Dean Smith nih Geneva ah a kuat” tiah Pu Renny Ceu Lian Mang nih cun a chimchap.

The Chinland Post zung ah Chin Media he ton biaruahnak ngeih lio

Cucu, a ca chung ah, anmah pumpak Chin ramkulh ah ni 10 chung a tlawn lio ah a hmuhtonmi kong cu a biapi in a langhter fawn tiah theih a si.

Senator Dean Smith nih 2018 January ah Chin Human Rights Organization (CHRO) le Chin Chairty hruainak in Chin ramkulh a rak phan. Laitlang khualipi a um chung ah, khuanu/pa, biaknak hruaitu, zatlang bu, media tbk. he tonnak a ngeih leng ah a cozah phu in Chief Minister le Hluttaw Speaker he zong tonnak a ngei.

“Senator Dean Smith nih a chimmi cu, Chin miphun an bawmtu hna caah champion si kaa zuam lai i atu lio Chin miphun nih nan herh bikmi hna chung in…
(1) Australian Citizenship sawk/ pomnak kong
(2) Malaysia le India ummi Chin miphun kong le
(3) 202 visa in chungkhat auhnak kong hna hi Australia ram nawlngeitu hna sin ah dengteo tein chim kaa zuam lai. Australia um Chinmi a bawmtu hna Australian Parliamentarian Support Group zong ser le tuah khawh kaa zuam lai i Chin miphun ca i ka tuaktanmi vialte hi Chin Media Phu sin zong ah chim phuannak ka ngei te lai a kan ti” tiah Chin Charity Chairman Pu Renny Ceu Lian Mang nih 2018 May thla thawkka ahkhan The Chinland Post ah a chim.

Australia Day an hmanpi lio

Senator Dean Smith hi Australia ram senator (hluttaw) lakah a hmasa bik Chinram a rak tlawngmi a si. Senator Dean Smith hi Australia ram ah senator (MP) 76 an um, cu lakah senator pakhat a si. Kawlram hi voili 4 a phan bal cang. Australia ram in cozah le senator vialte lakah 2018 January thla ahkhan a hmasa bik Chinram a rak tlawng. Hakha lawng hmanh si lo in Thantlang peng VP Henry Van Thio chuahkehnak Tikir khua tiang a va phan khomi Australia senator pakhat a si. Laitlang a rak tlawn lio ah Australia in Pu Renny Ceu Lian mang nih a rak zulh.

Chin Charity Inc Chairman Pu Renny Ceu Lian Mang hi Australia Chin Federation Inc ah Vice Chairman rian a tuan chih cuahmahmi zong a si. Chin Charity Inc cu Western Australia, Perth ah dirhmi zatlang bu a si. Australia rampi huap in dirhmi Australia Chin Federation he pehtlaihnak thate in a ngei i rian a tuantimi bu a si.

Na ruahning rak langhter ve.. (Leave a comment)

%d bloggers like this: