Tu Zanlei Suimilam 6:00 Tiang Nilen Par Mawi Vote Pek Khawh Rih A Si
City Hunter| 2018 June 22| Myanmar ramchung hlasaknak zuamnak ah a nganbik ti khawh a simi Myanmar Idol season 3, a thiam bik 10 (top 10) tiang Lainu Nilen Par Mawi cu a phan cang. Level pakhat a kai khawh rihnak ding ah tu zanlei suimilam 6:00 tiang vote pek khawh rih a si. Ooredoo simcard a hmangmi paoh nih 7777 ah 3 tiah tialpiak in vote pek khawh rih a si.
Tutan Myanmar Idol Season 3 i top 10 thimnak cu June 14 zan ah khan tuah a si i 15 zan ah result thanh a si. Minung 11 an i zuam i pakhat a tlak hnu ah a thiambik 10 an taang. Cu a taangmi 10 cu zahan zan (nili zan) ah an i zuam than i tuzan ah result an thanh lai. Tuzan ah minung pakhat a tla te lai. A tlami chung i aa tel lonak ding ah Ooredoo simcard hmang in na chanhchuah khawh rih.
Hi kong he pehtlai in Nilen Par Mawi hringtu a pa Pu Hrang Vung nih, “Nan hawinu, nan naunu Nilen Par Mawi hi kan Chin miphun zapi thapek le vote peknak in bawmhchanh le dirkamh cio kan herh. Chin miphun a cawisang khotu, mithmai a hngal khotu le teinak a hmu khotu a si khawhnak ding ah thlacamnak le vote peknak in rak kan bawm cio rih ko uh. Mizapi vote peknak hi a biapi tuk hringhran” tiah The Chinland Post ah a chim.
Ngaknu Nilen Par Mawi hi online le Sim card in vote pek a ngah hlan June 21 zan (nili ni) aa zuam lio ah mark petu lawng nih an biachahnak an tuah hmasa. Cu lio ah khan a number (Golden Ticket number) cu 09099 a si i mizapi nih vote pek a ngah hnu a voting number cu 3 a si.
Tuzan result thanh laimi caah Nilen Par Mawi na bawmh khawhnak lam pakhat cu simcard hmang in vote pek hi a si. June 21 zan suimilam 11:00 thawk in June 22 zanlei suimilam 6:00 tiang vote pek khawh rih a si. Ooredoo simcard hmang in Nilen Par Mawi vote pek na duh ahcun 7777 ah 3 tiah na tialpiak lai. Number 3 hi Nilen Par Mawi vote number a si.
Tutan ah Top 10 tiang aa tel khawhmi kong le a taang rihmi zuamnak he pehtlai in, “Nai tan zong ah mizapi nih vote nan kan pekmi ka hmuh tikah kaa lawm tuk. Hmailei zongah pehzulh tein nan thlacamnak le vote peknak in thazaang pek le dirpi ka herh rih ko” tiah ngaknu Nilen Par Mawi nih TCP ah a chim.
Nai tan Top 10 thimnak thawk in pehzulh in mizapi vote kha biapi bik in lak a si cang lai. Minung 11 lak ah khan mizapi pekmi vote tlawmbik a ngeimi pathum kha bottom down timi dirhmun ah chiah an si. Cu chung in a tlawm bik pakhat kha an thim than. A tlawmbik a ngahtu cu hlasak zuamnak ah mark petu an lung a ton khawh taktak hna a si le an thim khawh, an lung a ton tuk hna lo sual ahcun mizapi vote tlawmbik a ngeimi a si caah a tla lai.
Mizapi nih thazaang kan pekmi hna vote ning cu Myanmar Idol application kha download tuah in vote khawh a si. Download kan tuahmi application pakhat in minung pathum tiang vote khawh a si.
Cun Oredoo SIM Card in vote khawh a si. Oredoo SIM Card a hmangmi nih 7777 ah khan voting number na duhmi te khan a tial lai i na kuat lai. SIM Card pakhat in an duh zat paoh vote khawh a si.
Nu Mawi nih, Top 11 lio zongah mizapi nih thazaang tampi nan kan pek i thlacamnak le hmurka tiang lawng hmanh siloin vote tampi nan ka pek nak thawng in bottom down ah kaa tel lo. A tang rihmi zongah mizapi thazaang pek nak hi a biapi tak tak. Hla mark petu nak in mizapi vote hi a biapi deuh cang. Ka voting number cu 3 a si, hmailei zongah tu hlan bantuk in thlacamnak in siseh vote pek nak in siseh thazaang ka pe ulaw ka dirpi rih ko uh tiah Laimi carel tu sinah biacahnak a ngeih.
Ngaknu Nilen Par Mawi cu Engineering of Electronic Communication (EC) in Yangon ah sianginn a dih mi a si i Make Me Beautiful timi tamhmoih lei zuamnak zongah Myanmar Ram Pumpi huap in aa zuam i a thiambik pathum thimmi tiang aa telmi a si.
Amah hi kum 23 a si i Senthang peng Dongva khuami Pu Hrang Vung le Pi Thluai Iang @Thote nih an ngeihmi fanu hniang bik a si.
Nilen Par Mawi hi Eain Mat Sone Ya ah top 3 i a rak i telmi Nicholas Dawt Kam Sang far nu a si. Hi bantuk in fim cawnnak lei zongah sii-inn zungmawi thiamnak lei in siseh hlasaknak lei zong in siseh bochanmi a si i miphun dang hna lakah Chin miphun mithmai a kan ngeihtertu ngaknu pakhat a si. +++
About The Author
