Bawlakhe peng ah a um mi SAC ralkap sakhaan pakhat KNDF phufonh nih an lak, SAC ralkap a thi mi an tam
The Chinland Post | 2023 January 21 – Karen ram, Bawlakhe peng, Nankhe khua pawng ah a um mi Mesalaung tlang cung ah hmunhma a khuar mi SAC ralkap sakhaan pakhat cu January 20 zinglei sml 7:50am hrawng ah KNDF phufonh nih an kah hna tiah theih a si.
Zinglei sml 7:50am-9:00am tiang sml 1 leng kahdohnak a chuah hnu ah KNDF phufonh nih Mesalaung sakhaan cu an lak khawh tiah KNDF nih a thanh.
Kahdohnak chung ah SAC ralkap ruak 5 an hmuh i adang SAC ralkap tampi an zaam i KNLA phufonh lei in KA hriamtlai 1 a nunnak a liam tiah an langhter.
Kahdohnak a can lio ah SAC ralkap nih Helicopter in voi 3 tiang a rak bawmh hna bantuk in Bawlakhe hrambunh SAC Battalion nih hriamngan kah a bawmh lengmang hna nain sakhaan cu an khangh beh khawh tiah an langhter.
Sakhaan lak kahdohnak chung ah 60MM 2, RPG zuun 1, MA1 zuun 1, MA2 zuun 1, MA3 zuun 1, MA4 79 zuun 1, 9MM 1, Machine gun 1, Sniper zuun 1, bom tampi, zen tampi le adang thilri tampi an lak khawh tiah theih a si.
Kahdohnak chung ah KNDF Commando, KA, KNDF B15, B16, B09, Loikaw PDF le DMO PDF hna fonh in sakhaan an lak hi a si tiah theih a si.
About The Author
