Matupi ah kahdohnak voi 5 a chuak i SAC ralkap 17 an thi
The Chinland Post | 2023 January 23 — Chin ramkulh, Matupi peng chung ah kahdohnak voi 5 a chuak i SAC ralkap 17 an thi, MA1 zuun 1 an lak khawh tiah CDF-Matupi nih January 21 ah a thanh.
January 21 zinglei sml 8:30am thok in Matupi-Mindat lam cung ah a um mi SAC ralkap sakhaan cu CDF-Matupi B01 nih an kah hna hi a si.
Kaphnih karlak ah kahdohnak a fak i a sung deuh mi SAC ralkap pawl bawmh ding in zinglei sml 10:30am ah khuachung lei in a ra mi phu pawl he kahdohnak a chuak ṭhan.
Kahdohnak voi 2 cu CDF-Matupi B01 in Captain Lin Yung nih a hruai hna i SAC ralkap 9 an thi, hliam a tuar mi an tam leng ah MA1 zuun 1 zong an lak khawh tiah an langhter.
Cu ni chun sml 2:00pm-4:00pm tiang Matupi-Hakha lam cung CDF-Matupi B02 tlaihnak hmunhma chung ah kahdohnak voi 3 a chuak i SAC ralkap 8 an thi, 5 an i hliam tiah an thanh.
Matupi-Hakha lam cung ah a um mi CDF-Matupi sakhaan cu SAC ralkap nih thazang tampi in an rak luh hnawh hna caah CDF-Matupi hriamtlai 1 a nunnak a liam i hriam cheukhat zong an rak sung tiah theih a si.
Asinain January 21 ah CDF-Matupi, CDF-Mara le CDF-Zotung phufonh nih Ngalai khua ah hmunhma a khuar mi SAC ralkap sakhaan an kah hna i an lak beh ve.
Kahdohnak chung ah SAC ralkap 8 an thi, 5 an i hliam i CDF phufonh lei him tein an kir kho tiah theih a si.
About The Author
