Bawlakhe Um Ralkap 12 Miles Sakhaan Karenni Phufonh Nih An Lak
The Chinland Post | 2024 February 9 — Karen ram, Bawlakhe peng, Yuathit peng ṭhen ah a um mi ralkap IB 112 nih hmunhma an khuarnak 12 Miles sakhaan cu Karenni dothlennak phu pawl nih an lak khawh cang i ralkap cheukhat zong a nung in an tlaih hna tiah KPLA nih an thanh.
Bawlakhe le Yuathit peng karlak um 12 Miles sakhaan cu January zarhthumnak thawk in an kah i February 5 ah ralkap lei nih van lei le vawlei lei bawm in kahdohnak fak pi in a tuah ve nain February 8 ah sakhaan zapi tlamtling tein an lak khawh tiah theih a si.
Cu 12 Miles sakhaan chung in meithal zuun 11, Machine Gun le Pistol telh in hriam phun 16, Jammer le kuanzen pawl an lak khawh i ralkap cheukhat zong an tlaih hna i a tang mi ralkap pawl cu an zaam len tiah KPLA nih an thanh.
Cu 12 Miles sakhaan cu KPLA, KA, KNDF, PDF le Drone phu pawl a si mi KNPLF, Federal Wings, Force for Federal Democracy, PDF Drone phu pawl bawm in kahdohnak an tuah tiah theih a si.
Atulio Karenni ram Mese peng, Mawchi peng le Yuathit peng hna cu Karenni dothlennak phu pawl nih an tlaih dih cang tiah theih a si.
2023 November 11 in an thawk mi Operation 1111 chung ah Loikaw, Demoso, Moebye khua um ralkap sakhaan 20 leng an lak khawh bantuk in Loikaw um ralkap ROC zong an kulh dih cang i Loikaw khua cheu 3 cheu 2 cu an lak cang tiah KNDF nih an thanh.
Cu leng ah Shadaw khua ralkap sakhaan zapi an lak khawh cang caah khua lai pura tlang ah ralkap nih hmunhma an khuarnak lawng a tang cang. Karenni he aa tlaihnak Shan ram thlanglei Moebye, Pekon khua luhchuahnak zong dothlennak phu pawl nih an lak khawh cang i Shan-Karenni ramri um Hsihseng khua zong ah dothlennak phu pawl nih hmunhma an khuar cang tiah KNDF nih January 28 ah thawng a thanh.
About The Author
