Buddhist Titoih Puai Cu Mitam U Biaknak Puai A Si Caah Cozah Nih Tuan Ding Tuanvo A Ngei; Minister Pau Lun Min Thang

Salai Ngun San Aung| 2018 March 27| Chin ramkulh khuahlipi Hakha ah 2018 Buddhist titoih puai cu kumdang tawn bantuk in cozah hruainak in tuahding timhlamh a si than cang.

Tukum tuah an timhmi ah cozah zung rian tuanmi hna hramhram in lam ter, tlawm thawhternak kong le hi bantuk biaknak pakhat puai a simi cozah nih tuanvo lak in tuah timi kongah puai a tlamtlin nakding hoatu tuanvo ngei Social Minister Pau Lun Min Thang nih a tang lei bantuk in a chim.

“Tukum ca hi meeting voikhat lawng kan tuah rih. Tu thla ni 30 ah voikhat kan tuah than lai. Kan hnu meeting zong ah ka chim, tukum cu hohmanh hramhram in lam ter le tlawm thawhter a um lai lo. Asinain anmah le an zung cio ah an upa te nih zeitin an tlawlrel hna lai timi bel cu anmah nawl si lai. Cun tukum cu Idol ti bantuk a um ti lai lo. Lam tu tam deuh in kan tuah lai. Lam le tlawm thawh kong ahhin kei cu kan i tel cio awk a si ko tiah ka ruah. Tlawm zong cu thawh cio awk a si ko, a herh ahcun kanmah zong nih kan thawh ko lai ka ti hna. Cun cozah nih kan tuah lengmang mi kong tu ah cun kan ram chung milu rel tam u a simi hna an biaknak a si caah Cozah nih tlangtlak in tuah piak ding ah tuanvo a ngei tiah ka hmuh. Christmas le a dangdang puai tibantuk zong kan tuah ko lai. Christmas bel hi mah le Khrihfabu cio in tuah a si tikah cozah nih kan tuah zongah minung chuah a si lo.”

Hi kong he pehtlai in Chin Human Rights Organization Project Director Salai Van Biak Thang nih, “hihi a chung ah khin cunglei upa te nih zung riantuan mi khi hi titoih puai ah nan lam lo ahcun cutin kha tin a si lai ti bantuk in tlerhkhawnhnak um dawh a si. Kan i tel lo ahcun timi tihphannak an ngei rua. Cucu kan rak doh lengmang mi a si. Mi pakhat nih tihmi a ngeih ruang ah siloin amah lungtho tein aa tel ahcun cucu amah pumpak nawlngeihnak a si caah buai ding a um lo. Asinain pakhat khat tihphannak ruangah a si ahcun cucu amah pumpak nawlngeihnak in a si ti lo caah a dik lomi a si. Cun Cozah nih biaknak puai tuah hi tuahnak nawl zong cu an va ngei ko lai. Asinain biaknak dang a fa tete ca zong ah aa ruang tein an tuah awk asi. Biaknak cheukhat nih an biaknak puai tuahnak nawl an ngeih lo lio le tuahnak nawl cozah sinah an hal zong i an onh hna lo lio ah anmah cozah nih mitam u papek in an biaknak puai va tuahpiak tibantuk cu a tlari lo. Cozah cu mizapi aiawh an si caah mizapi caah aa ruang tein rian an tuan awk a si” tiah a chim.

Hakha penguk bawi Pu Chan Fiang nih cun, “Laimi pawl Kawl pawl titoih zungkhaar caan i Laimi Khrihfa nan laam lai; Zung nan kai lai tihi zeitin dah nan ruah cio? Kei cu ka el cang hna hih. An ka thuat te ko lai” tiah a pumpak facebook cahmai ah a tial.

Hiti a tial mi cu kum dang zong ah zung lutlai cio kha cunglei upa nih nawl pek in nannih zung in minung cuzat nan chuahpi hna lai tibantuk in nawl pek a um caah cucu a duh lonak le a elnak hna kong a tialmi a si i amah pumpak kan pehtlaih khawh lo caah a facebook cahmai i a tialmi tu kan langhter nak a si.

Puai tuahnak caah tuanvo ngei Minister Pau Lun Min Thang nih cun tukum cu hohmah hnek a um lai lo. Mah le lungtho tein aa tel duh mi i tel a si lai i anmah le an zung cio in zeitin an i tlangtlak timi bel cu anmah nawl a si lai a ti caah kumdang bantuk in zung pakhat in a laam tu ding minung cuzat tibantuk in i fial cu a chung in um dawh a si ko. +++

Leave a Commnet

%d bloggers like this: