Bungzung Ah Mirang Vawlei Sernak Seh-zung An Hun Lai

Salai Elvis| 2018 January 23| Hakha peng Bungzung khua ah mirang vawlei seh-zung hun ding in timhtuahnak an ngei tiah thawng kan theih.

Bungzung khua cu vanlawng tumnak, mirang vawlei seh-zung le tlanglawng lam pemh ding in timhtuahnak ngeih a si. Hi kong ah Chin ramkulh cozah zong nih zohfelnak an ngei cang tiah kan theih.

“Vanlawng tumnak zong ramkulh cozoh nih kan va zoh i an lungtling ngai. Ramchung vanlawng paoh cu a tum kho lai. Cu pin ah mirang vawlei serchuahnak seh-zung zong hun a si lai. Thiamsang hna nih September thla khan zohhram an thok i thla nga chung an zoh fel cang i zatuak 80% cu an lim cang i a tu zong an um peng ko rih. Anmah chimning ahcun mirang vawlei hi a tha tuk zong a si lo a laifang a si an kan ti. Zeitik ah rian an thok lai theih a si rih lo. Cun tlanglawng lam zong Bungzung tiang ra kho dingin upa te nih an duh ngai” tiah Chin ramkulh Lam le sul minister Pu Sui Thio nih The Chinland Post ah a chim.

Atu bantuk in Bungzung ah leitang chuak mirang vawlei kan i ngeihmi nihhin chimawk tha lo in thathnemnak tampi an kan pek te lai. Bungzung khua cu a ceu/tleu te ko lai hih! tiah a biapeh ah a chimchih.

Chinram chungah Vanlawng tumnak Cozah nih hmunhma a zoh cangmi cu; Falam Surbung tlang, Thantlang Vuichip tlang, Hakha peng Bungzung khua, Tedim peng le Dr. Sa Sa tawlrelnak in Lailenpi an si. Falam peng Surbung tlang vanlawng tumnak cu atu hi 2020 ah lim ding ah cozah budget in an sak cuahmah lio a si. Cu bantuk in Lailenpi zong hi Dr. Sa Sa thithruainak in vanlawng tumnak cu an tuah cuahmah cang tiah kan theih. +++

Leave a Commnet

%d bloggers like this: