World Paih Championship Committee Tawlrelnak In February 3 Ah Paih Phunli Zuamcawhnak An Tuah Lai

City Hunter| 2018 January 24| World Paih Championship committee tawlrelnak in paih phunli zuamcawhnak cu February 3, Indianapolis ah tuahdingmi Chin Miphun Ni ah sunglawi ngai in an tuah lai tiah thawng kan theih.

Hi kong he pehtlai in World Paih Championship committee haotu Pu Ang Cung cu The Chinland Post nih pehtlaihnak kan tuah i atu bantuk in a chim.

“A ralaimi February 3, Indianapolis ah tuahdingmi Chin Miphun Ni ahhin World Paih Championship committee tawlrelnak in Lai paih zuamcawhnak phunli kan tuah lai. Chin Miphun Ni tuahnak le Paih tuahnak tibantuk a zapi hmanding ah US$ 35,000 kan i chiah. Paih zuamcawhnak tuahding phunli hna cu; Zatlang Paih, pound 160 tang (middle weight) khing a ritmi paih, pound 160 cung (heavy weight) khing a ritmi paih le World Championship paih an si. Pound 160 tang le pound 160 cung khingrit aa paih dingmi hi minung 8 veve an si lai. World Championship tu cu Rung Lian Ceu le Tial Cung Thang an i pai lai” tiah Pu Ang Cung nih The Chinland Post ah a chim.

“Zatlang paih hi minung pakhat ah tei ah $ 20, minung tambik a teitu cu $ 500 le trophy laksawng pek a si lai. Zatlang paih champion cu $ 2000 le champion taisawm laksawng pek a si lai. Pound 160 (middle weight) champion laksawng cu $ 3000 le champion taisawm pek a si lai. Pahnihnak cu $ 1000 le trophy pek a si lai. Pound 160 cung (heavy weight) champion laksawng cu $ 4000 le champion taisawm pek a si lai. Cu pin ah hi hnu paih tuah than tikah dengteo (direct) in World Paih Championship aa cuh kho colh lai. Pahnihnak laksawng cu $ 1000 le trophy pek a si lai. World Paih Championship laksawng cu $ 6000 le champion taisawm, pahnihnak cu $ 2000 le trophy pek a si lai. Hi Chin Miphun Ni caah hlasak thiam minung pathum zong sawm an si. Hlasaknak le Lai laam laamnak zong a um chih lai” tiah a biapeh ah a chimchap.

Paih hi anmah US lei caan in February 3, chun suimilam 12:00 in zan suimilam 12:00 tiang an tuah lai. Zatlang paih hi chun suimilam 12:00 in zan suimilam 6:00 tiang an i paih lai. Cun zan suimilam 6:00 in 12:00 tiang pound 160 tang le pound 160 cung paih phunhnih pin ah World Paih Championship zuamcawh paih a si lai tiah kan theih.

World Paih Championship cu 2017 kum in an dirh thawkmi a si. Minung paruk in committee an ser i an hruaitu bik haotu cu Pu Ang Cung (Hakha Khuahlun) a si. World Paih Championship a hmasa bik zuamcawhnak cu 2017 kum Indianapolis ah tuahmi Lai Tho (Chin Kumthar) ah an tuah. Hi lio ah Rung Lian Ceu nih champion a laak. Tutan, February 3 ah tuahtimhmi hi a voihnih World Paih Championship an tuah a si lai.

“World Paih Championship nih aa hmuitinhmi suttung pathum cu; Lai Pa thawng vialte nih Lai Paih in pawcawmnak khim tiang laksawng an hmuh khawhnak ding, ramchung ramleng hmunkhatte ah Lai Paih i hrawmti le i paihti ding, a pathumnak cu Lai Paih hi Sea-game tiang luhpi ding hi an si” tiah Pu Ang Cung nih The Chinland Post ah a chim.

Photo: Google

Leave a Commnet

%d bloggers like this: