Hakha Myomah Market Thar Sakmi Foundation An Hrawh; Zeiruang Ah?

Chinland Post| 2018 January 23| Hakha, Pyidawtha sang ah sakmi Hakha Myomah Market thar sakmi cu January 23 ah foundation sak ciami vialte an hrawh dih than tiah kan theih.

Hakha Myomah Market tharpi sakmi foundation cu lungtling a si lo caah tuanvo ngeitu cozah lei nih caankarlak chung an dinhter chung hna. Cuti ni tlawmpal an dinhter hna hnu inntung hram an bunh (foundation an sak) cia dih cangmi cu January 23 ah an hrawh dih than.

Hi kong he pehtlai in The Chinland Post nih Hakha Myomah Market thar a satu Excel Design Development Company in Simanking Engineer U Soe Min ton biaruahnak kan ngeih i atu bantuk in a chim.

“Tender kan ngah lio ahhin inn hi dothnih le cheu lawng in sak ding a si. Cun, tektlak le lihnin tikah rawhral kho lo ding in sakding timi aa telchih lo. Cun, hi market pi hi saknak lei tuanvo latu committee nih sa cio uh tiah nawl an kan onh hlan ah sak hram kan thawk. Hihi a caan chung ah kan lim kho sual lai lo ti kan phan caah cunglei cozah upa cheukhat kan chimh hna i rian kan domh cia chung. Cu tikah kan sakmi inntung bunh (foundation) cu tuanvo ngeitu upa cheukhat le Hakha khuami upa cheukhat an lungtling lo. Hiti ning cun, inn hi a fekfuan lai lo, li aa hnin tik le tek a tlak tikah a rawhral kho. Cucaah, tek a tlak le zei bantuk li aa hnin zong ah a rawk kho lo ding in foundation hi kan sakpiak than uh an kan ti.”

“Inn saknak lei tuanvo latu committee le khua upa nih an duhning dotthum sakding siseh, zeitluk thil a rih zong ah inn ah a intuar khawhnak ding sakding siseh, tektlak le lihnin zong ah rawk kho lo ding in kan sakpiak than uh an kan ti. Cuti an duhning in cun kan rak sak ciami kha rinh awk a tha lo caah atu bantuk in inntung kan bunh ciami foundation kan hrawh than dihnak hi a si” tiah U Soe Min nihcun TCP ah a chim.

“Tender kan rak ngahmi ahcun earth quake + windload design hi aa tel lo. Atu cu tuanvo ngeitu upa duhningte in earth quake + windload design in inn cu kan sak than ko lai. Tender biahren ning in March thla chung ah lim khawh ding in sak kan i zuam ko lai” tiah a biapeh ah a chimchap.

Hakha khuami upa pakhat nihcun, “foundation an bunhnak ah an hmanmi thetse le thilri dang tete hrimhrim zong hi quality a tling lo. Cun an sakning a tha fawn lo. Cu ruang ah atu bantuk in tuanvo ngeitu nih an hrawhter thannak hna le a thar in sakter thannak hna hi a si ko lai” tiah The Chinland Post ah a chim.

Hi kong he pehtlai in market saknak lei tuanvo ngeitu upa le sipin lei upa kan ton kho in pehtlaihnak kan tuah kho hna lo.  Foundation bunhmi le sakmi ngolter chung nak he pehtlai in January 15 ah atu bantuk in Chin ramkulh Sipin Director Pu Thla Hre nih The Chinland Post ah a chim.

“Nai te ah a chiatthat kan va zoh i lungtling a si lo caah a thar in domh than ding a si. Chikhat nan rian tuanmi ngol chung rih uh kan ti hna. Hi inn pi hi a tlawm lei in ton 400 tluk a rit lai, cun dawr thil, dawr hngaktu minung le thil caw mi vialte khing kha a si lai tikah qualitya that taktak a hau. Cucaah tu hi Technical lei Consultant kan auh lai. Cucu Third Party bantuk in hohmanh mithmai zoh lo tein an rian a chekfel tu ding an si lai. Consultant caah Tender kan auh lai i Tender a hmu kho tu an um hnu in rian cu domh than a si te lai” tiah TCP ah a chim.

Hi market innpi saknak ca ahhin Cozah nih sing 8000MMK a pek i dawrkhan zuar man in sing 1300, a dihlak fonh ah sing 9300 in sak dingmi a si. 2017-2018 tangka kum chung bawmhnak in sak ding a si caah 2018 chung ah pello lim ding a si. Dawrkhan 42 soktermi hna zong January 26, Town Hall ah mee zuhter an si lai tiah kan theih. +++

Leave a Commnet

%d bloggers like this: