Bungzung I Mirang Vawlei Sehzung Hun Dingmi Ah Thungrang Lung Hi Nikhat Ah Ton 5000 Lengmang A Chuak Kho Lai
City Hunter| 2018 May 22| Chin ramkulh Hakha peng, Bungzung ah Mirang vawlei (Bilatme_cement) sehzung hun ding in cozah nih hnatlaknak a ngeih cang. Bungzung i mirang vawlei sehzung hun dingmi ah thungrang lung (limestone_ထံုးေက်ာက္) hi nikhat ah ton 5000 lengmang a chuak kho lai tiah theih a si.
Hi kong he pehtlai in Myanmar rampi Vice President Henry Van Thio avoi thumnak Chinram a tlawn lio le Bungzung a phak lio May 20 ah ramkulh thingram zung in Director U Win Naing nih atu bantuk in fianternak a tuah hi a si.
Vice President Henry Van Thio le a hnuzultu hna cu May 20 chun ah Hakha peng, Lei-um (B) khuapawng Bungzung hmunhma LungrangKalang timi Thungrang lung (limestone) tlang an phan. Chin ramkulh thingram zung in Director U Win Naing le tuanvo ngeitu hna nih 2017 October 17 in 2018 March 31 tiang Bungzung hrawng thung tlang cu a dikthliar in zohfelnak le tahnak an tuah. Cuti zohfelnak le tahnak an tuahmi phichuak kha Vice President sin ah chimhfiannak a tuah hi a si.
“Hi Bungzung hrawnghrang thungrang lung (limestone) chuahnak ding hneksaknak hmuhchuahmi ning ah nikhat ah thungrang lung hi ton 5000 lengmang a chuak kho ding a si caah mirang vawlei sehzung dirh awk a tlak taktaknak cu a si. Hi mirang sehzung le simanking hi kan tuanchuah khawh ahcun Chin ramkulh ca lawng si lo in Chin ramkulh he aa pehtlaimi Magwe ramthen le Sagaing ramthen thanchonak pin ah khuami hna rian tampi a serpiak fawn hna lai caah hlawknak tampi a kan pek lai. Chin ramkulh, Magwe le Sagaing ramthen nihcun nihin tiang mirang vawlei hi Kayin ramkulh Maingkalay le Mandalay ramthen Kyautsee lawng in hmuh le phorh khawh a si. Cucaah hika i bilatme kan serchuah khawh ahcun man fawi deuh in kan ngah khawh pin ah rampi ca le ramchung thil serchuahnak GDP zong a karhter deuh lai. Simanking tawlrel tikah pawngkam hnorsuannak a tlawm bik ding le ralring te in nan tawlrel lai” tiah Vice President Henry Van Thio nih forhfialnak biaro a cahtak hna.
Bungzung thungrang lung (limestone) tlang hi ekah 36.8 square kilometer chung ah သ-၂ le သ-၃ level a simi thungrang lung ton 511.13million a chuak lai tiah hlathlainak an tuahmi ning in hmuhchuah a si. Mah lawng si lo in mah Bungzung kiangkap hrawng ah thungrang lung tampi hmuh chap khawh rih a si caah mirang vawlei le tamhmawihnak lungper sehzung simanking tuanchuah khawh a si lai tiah theih a si.
Bungzung hall ah Bungzung khuami nih khua thanchonak caah an herhmi pawl halnak an ngeih. Cu an halmi le khua thanchonak he pehtlai in Pyi-htay-zi ministry zung in a zungzal chungtel a simi U Tin Myint, Ngandamnak Le Zaanglekcelhnak ministry zung in General Director Dr. Kyaw Zin Thant le tuanvo ngeitu hna nih anmah le rian hoih le budget kum hoih in a herhmi bawmhchanhnak pek ding timhtuahnak an ngeihmi pawl fianhnak an leh ve hna.
Ref: Myanmar President Office
About The Author
