Chaing Mai University le Spring University fonhmi program in siahngakchia 500 man loin ca an cawng lai
The Chinland Post | 2022 August 11 – Thai ram, Chaing Mai University le Spring University fonh in rianṭuanṭi dingah hnatlaknak minthut an tuah i program an ngeih ning ah, siahngakchia 500 tiang cohlan le chimh a si lai i a kaimi hna caah man lak a si lai lo lengah siahngakchia hna caah internet man bawmhnak zong pek a si lai tiah Spring University nih a thanh.
Spring University cu Thai ram, Chaing Mai University kuttang sianginn pakhat he rian a ṭuanṭimi an si i a raa laimi kum 3 chungah Myanmar siahngakchia caah caan tawi, caan sau Research program pawl, ramdang he pehtlaihnak pawl rianṭuanṭi a si lai.
Atu lioah Spring University cu sianginn 11 fonh in dirh a si i training 400 leng tuahpiak a si. Thla 2,3 hrawngah Certificate ngahmi training lengah thla 9 hrawng cawnnak a simi Diploma training 4 zong awn a si. Kumkhat leng ah siahngakchia 10,000 leng training pek an si tiah a thanh.
Chiang Mai University kuttang sianginn he fonh in rianṭuanṭinak cu kum 3 tiang a rau ding in hnatlak a si i 2022 kum dongh ah siahngakchia cohlan a si lai. Myanmar ram hnumkip in mino pawl i tel khawhnak dingin training cu online in chimh a si lai i training caan hi thla 3-6 tiang a rau lai. Training ṭha tein a dihmi siahngakchia pawl cu Spring University le Chaing Mai University i Certificate ngah a si lai tiah a thanh.
Training soknak he aa pehtlai mi program zong a rauh hlan ah kan thanh lai tiah Spring University sin in theih a si.
About The Author
