Champion Voi 7 A Co Cangmi Lai Pasaltha Rung Lian Ceu Konglam Tawi

City Hunter| 2018 January 26| Rung Lian Ceu hi mi zeidah a si? Zei a thiammi dah a si? Zei a tuah liomi dah a si, na hngal ve cang maw? A hngal rih lomi ca le amah upat peknak caah The Chinland Post nih a tanglei bantuk in a konglam tawite in kan hun langhter.

Rung Lian Ceu cu Hakha peng, Chuncung khuami Pu Si Hmung le Pi Tum Zing fapa a si. A chuahpi unau pa pathum le nu pahnih an si. Rung Lian Ceu hi 1994 July 3, Chuncung khua ah a chuak. 2006 December 16 kum ah Malaysia a phan. 2007 September 13 ah USA a phan. Atu hi Taxes, Amarillo college pakhat ah Automotive Technology (Auto-Technician Engineering) a kumthumnak a kai liopi a si.

A tungkhaan hi pe 5 le letmah 8 a si i pound 202 a rit. Pumrua tha, pa dawh a si. Amah hi lentecelh phunkhat a simi Lai Paih a thiam taktakmi a si. Paih zong a thiam i a tha zong a thawng.

American a phanh hnu ah atu hi voi 9 aa pai cang i cu chung ah voi 7 bual a co cangmi pasaltha taktak a si. Voi 9 aa paih chung ah voi hnih a sung. Cucu, 2014 kum Indianapolis ah tuahmi Chin National Day ah Tial Cung Thang nih a rak tei. Avoi hnihnak cu 2015 kum Indianapolis thiamthiam ah tuahmi Chin National Day ah Kap Tawng nih a rak tei i a sung.

Paih champion a conak hmun le kum cu;
1). 2013 kum, Taxes State, Amarillo ah tuahmi Chin National Day ah bual a co.
2). 2015 kum, Taxes State, Amarillo ah tuahmi Chin National Day ah bual a co.
3). 2014 kum Taxes State, Amarillo ah tuahmi Chin National Day ah bual a co.
4). 2015 kum, Dallas, Taxes ah tuahmi Lai Tho- Champion League paih ah bual a co.
5). 2016 kum, North America nih a tuahmi World Championship paih ah champion a co.
6). 2017 kum, North America nih tuahmi Chin National Day ah champion a co.
7). 2017 kum, World Paih Championship nih a tuahmi Lai Tho (Chin Kumthar) paih ah champion a co.

“A ralaimi February 3, Indianapolis ah tuahdingmi Chin Miphun Ni ahhin World Paih Championship committee tawlrelnak in Lai paih zuamcawhnak phunli kan tuah lai. A phunlinak a simi World Paih Championship ah Rung Lian Ceu le Tial Cung Thang an i pai lai. World Paih Champion laksawng cu $ 6000 le champion taisawm, pahnihnak laksawng cu $ 2000 le trophy pek a si lai. Pathawng veve an si caah aho dik aa tei te hnga, zoh an nuam tuk te lai” tiah World Paih Championship phu in haotu Pu Ang Cung nih The Chinland Post ah a chim.

Chinmi chung ah amah tluk in hi bantuk nisunglawi caan ah Bual a comi an um rih lo tiah kan theih. Rung Lian Ceu konglam hi World Paih Championship a dirhtu Pu Ang Cung sin in kan hngalh khawh tawk kan hun tialmi a si.

Photo: Rung Lian Ceu facebook, google

Leave a Commnet

%d bloggers like this: