Thantlang Khualuhnak Ah Dinh Hmun Thar An Tuah
Salai Elvis| 2018 January 25| Thantlang khualuh lainak hauka ah dinhhmun (mini park) thar cu penguk zung lei le sipin hruainak in mizei paoh lam lennak le i dinhnak caah hmun thar an tuah tiah thawng kan theih.
“Hi hmun kan tuahnak cu Thantlang khua chungah nuamhnak le lam lennak hmun hma tha a um lo tikah a tu bantuk in penguk zung le sipin i bawm in kadang budget hal lo tein kan tuah hi a si. Hi hmun ah hawi le kom in siseh chungkhar in siseh tlonlen a duhmi nih tlonlen khawh a si i zan ah mei phu tohnak zong tha ngai in kan tuah i cu ah cun hlasak le tlonlen khawh a si. Hi chungah hmunthur zong hlonh sawh lo in a chiahnak te ah tha tein fim khawh i zuam cio u si. Tlawmpal ah khuacuanhnak (view point) zong an lim lai. Hi hmun hnih ah mino pawl zong zalong tein lam len khawh a si cang lai” tiah Thantlang penguk bawi U Swam Htet nih The Chinland Post ah a chim.
“Pangpar dum hmunhma zong hmaikum leiah tuah timh a si ko. Atu lio ahcun vawlei le tangka lei kan chambau rih caah a si. Atu dinhhmun kan tuahmi ah thutnak le meiphu kaunak hmunhma zong tha tein kan tuah dih cang, a rauh hlan ah hman khawh a si cang lai” tiah U Swam Htet nih a chim.
Atu bantuk in Thantlang khua dawhnak le tamhmuaihnak caah penguk zung le sipin i bawm in khuachung ah pangpar dur (flower box) zong hmun tam nawn ah an chiah cang tiah theih a si. ++++
About The Author
