Chin Charity Bawmhnak In Australia Ram Ah Laimi 300 Hrawng Nih Rian An Hmuh Cang
City Hunter| 2018 March 19| Australia ah hram a bunhmi Chin zatlang bu Chin Charity Inc pehtlaihpiak nak thawng in Australia ram company 8 ah Laimi 300 hrawng nih rian an hmuh cang. Chin Charity pehtlaihpiak le bawmhnak thawng in Australia ram ah Laimi pahnih interview tuah hau lo in March 19 ah rian an hmu tiah kan theih.
Hi kong he pehtlai in Chin Charity Inc Chairman Pu Renny Ceu Lian Mang cu pehtlaihnak kan tuah i atu bantuk in The Chinland Post ah a chim.
“March 19 in Chin Charity pehtlaihnak le bawmhnak thawng in company pakhat ah interview tuah hau lo in Laimi pahnih rian an hmu. Cuti rian a hmutu cu Mengku le Stacey an si. 2018 kumthawk ka khan kanmah bawmhnak in Laimi 30 nih rian an hmu fawn. Chin Charity nih Australia ram ah pehtlaihnak kan tuah khawh cangmi hi company 8 a si. Hi company 8 chung ah Laimi 300 hrawng rian an hmu cang. Hi chung in Vok thahnak company pakhat lawng bak ah Laimi 100 leng rian an tuan. Kanmah Chin Charity nih kan pehtlaihpiakmi hna paoh cu interview tuah an hau lo. Interview tuah hau lo in rian an pek hna. Kanmah pehtlaihpiak nakin rian a hmumi Cung Lian Thang cu company nih supervisor rian tiang a tlai kho cang i suimilam pakhat ah dollar 35 tiang a hmu kho cang. Chungkhar auhnak rian ahhin nupa khuah 14 leng auhnak le laaknak kan tawlrelpiak cang hna.”
Chin Charity Inc cu Chin miphun caah zaanghleicawi in miphun dawtnak he rian a tuanmi bu an si. 2004 in an thawk. Chin Charity nih aa hmaithlakmi rian hi phun thum a si. 1). Australia ram phan Chinmi rian ngei lo pawl rian kawlpiak rian, 2). Australia a phan cangmi Chinmi nih an chungkhat, an unau hna auh le laaknak rian, 3). Australia um Chinmi nih ningcangte in motor cawk le zohkhenhning bawmhnak rian an si tiah tuanvo ngeitu upa sin in theih a si.
“Pu Jacob Nawn he 2004 hrawng ah khan Kersta Blind riantuannak ah Laimi 25 hrawng kan rak luh hna. Cu dih hnu cun Pu Jacob Nawn cu motor cawknak le zohkhenhnak ah, Pu Cung Chin Lian he tuanvo pek an si. Pu David Dun cu chungkhar auhnak ah tuanvo pek a si i keimah hi rian kawlnak lei ah tuanvo pek kan si. Rian kawlpiaknak, chungkhar auhnak rian, motor cawknak le motor zohkhenhning rian hi online zong in kan chimh, kan cawnpiak hna, kan tawlrelpiak hna. Kanmah nih dengteo in kan pehtlaihpiakmi hna an um bantuk in company nih an rak kan pehtlaih caan zong a um. Cun, kanmah nih minung pakhat kan pehtlaihpiak hna hnu ah anmahte in an u, an nau tibantuk in rian an kawlpiak chinmi hna zong an um ve” tiah Chin Charity Inc Chairman Pu Renny Ceu Lian Mang nih a biapeh ah a chimchap.
Chin Charity Inc cu Western Australia, Perth ah dirhmi zatlang bu a si. Australia rampi huap in dirhmi Australia Chin Federation he pehtlaihnak thate in a ngei i rian a tuantimi bu a si. Chin Charity Inc Chairman Pu Renny Ceu Lian Mang hi Australia Chin Federation Inc ah Vice Chairman rian a tuan chih cuahmahmi zong a si.
About The Author
