Chin History Museum An Sak Cuahmah

Salai CungCung|2019 June 3| 2020 ah lim ding in Chin tuanbia, nunphung thilri le Chin miphun he aa pehtlai mi paoh chiahnak caah Chin History Museum cu an sak cuahmah cang tiah kan theih.

Falam khua Laihlun lungkua pawng ah um ding mi Chin History Museum cu a luancia April 24 ah khan innkillung bunhnak an rak tuah i GCO _Global Chin (Falam) Organization bu nih an rak sak. 2020 March thla ah tuah ding mi avoi 2nak Falam khua inntlun kum ah hunnak an tuah lai tiah kan theih.

Hi Chin History Museum sak ding ah a dih ding tangka cu GCO tawlrelnak in vawleicung hmunkip um Chin miphun sin ah bawmhnak hal in sakmi a si tiah GCO Bu in EC chungtel Pu Van Neih Cem nih a chim.

“Atu a dih ding budget tuakchunhmi hi ks. sing 3000 a si. Asinain, dotthum in kan sak ahcun ks. sing 5000 hrawng a herh te lai. Hi inn saknak caah a herhmi tangka vialte cu vawleicung hmunkip um Chinmi sin ah bawmh kan hal” tiah a chimchap.

GCO (Falam) cu 2017 kum Falam khuapi inntlun kum ah an rak dirh i GCO nih ks. sing 500 hrambunh le tawlrelnak in rak timhmi a si.

Ref: Khonumthung

Leave a Commnet

%d bloggers like this: