Kaladan Hlei Donhnak Caah Chin Ramkulh Cozah Nih 6 Billion A Pek
Salai Elvis| 2019 June 3| India-Myanmar pehtlaihnak ding a si mi Paletwa ram Kaladan hleidonhnak ding caah Chin ramkulh cozah nih 6 Billion chuah in kan pek tiah sipin vuanci nih a chim.
“Atu lio Budget umtu ning le a tangmi riantuannak ding caah 12.3 Billion tluk lawng aa duh cang. Chin ramkulh cozah nih 6 Billion pek ding chungah 2018-2019 kum ah 2 Billion kan pek cang i 2019-2020 buget kum ah a tangmi 4 Billion kan pek nolh than caah ramkulh cozah nih kan pek ding aa lim cang. Hi chungah sakremhnak zung nih 6.3 Billion tluk an pek ve lai. Rampi cozah nih 6.3 Billion leng an pek ve cang. Cucaah thir (waring saw) tibantuk a caan zohhnu ah hi rianpi cu aa caan chung teah aa lim kho te ko lai” tiah Myanmaalinn he biaruahnak ah U Soe Htet nih a chim.
Hi Kaladan hlei donhnak simanking caah rampi cozah nih 27 Billion tluk dih in a tawlrel mi a si.
“Hi hlei aa lim hin cun Paletwa khua pawngkam khua 200 tluk caah le Na-ta-lah, sakremhnak le khuate thanchonak zung nih tawlrel mi Concrete lam an tuah mi zong khua khat le khua khat pehtlaihnak, thilri phurtlunhnak ca, Rakhine ram lei zong nih hman khawh a si lai nak le Bangladesh ram zongah fawizaang tein kal khawh a si lai caah thathnemnak tampi a kan pek lai” tiah vuanci U Soe Htet nih a chim.
Mah hlei donhnak rian cu 2017 May 1 in rakthok mi a si i rampi sakremhnak zung, hlei kongkau tuanvo latu No.1 lutlai (Director) pumpak nih um hnawh in sak mi a si. Ramkulh sipin vuanci U Soe Htet zong pumpak in 2019 May 30 nih ah hlei sakmi zohfelnak le khua le ram thanchonak kongkau zohfelnak zong a ngei tiah kan theih.
About The Author
