Chin Kum Thar (Tho) Hakha Hlunghlai Ngai Tuah_Van Bawi Hmun Nih Champion A Co

Salai CungCung|2019 October 21| 2019 Hakha Nunphung le Caholh lei Committee tawlrelnak in tuah mi Tho puai 2019 October 19 Con Bik Hall, Hakha Khuathar Paihnak ah Senthang peng in Van Bawi Hmun nih Champion tangka Sing 5 le Trophy in a co tiah kan theih.

“Tukum Tho Puai ah kan tuah kho mi cu Lai lam, Lai thilthuam hmuhsaknak, Lai thilthuam zuarnak, Lai Paih Paihnak, Lai hlasaknak, Lai hlasaknak ti tik ah chanthar hla bantuk sak mi le hlanchan hlasakmi, biatawi chimnak ah Chin ramkulh Chief minster ai-awh ah minister Pual Lun Min Thang nih a chim, Hluttaw Speaker Pu Zo Bawi, Hakha Nunphung le Caholh in Pu Thla Kio Lian, Hakha khuanu khuapa in Pu Ral Kham hna nih bia an chim. Hi Tho Puai ah hin Khrihfa phun ning tein hramthawk thlacaamnak le thlachuah peknak in kan dongh ter” tiah CACC Art & Culture Dept. Secretary Rev. Dr. Khar Ling nih The Chinland Post ah a chim.

Paih ah Sakta in Van Bawi Hmun nih pakhatnak a hmuh, pahnihnak ah Hniarlawn in Tuan Ceu an si pathum cu a um ti lo. A dang pawl cu tluanhnak laksawng in Ks.10,000 cio pek an si. Hi paih ah hin zatlang le zuamcawh tiin kan then hna lo, peng le tlang zoh in a thawngbik timi pawl kan thim hna i kan paih ter hna.  An zapi aa paih mi hi minung 32 lawng kan thim hna i kan zuam ter hna. Paih Committee lei nih (A) group (B) group ti in an then hna i group pakhat ah minung 16 tiin an zapi 32 an paih ter hna. Cu hnu ah minung 16 an tang I minung 8 in an then hna cun minung 4 tiin an than hna a donghnak minung 2 in an than hna i pakhatnak le pahnih tiang hmuh mi kha an zoh hna tiah theih a si.

Hi Tho puai caah tangka Sing 50 leng dih in an tawlrel. Cozah lei nih Sing 20 bawmhnak an pek hna, cun adang pawl cu khuachung in bochan mi le Paih pahnihnak laksawng caah Sing 3 cu CACC nih an bawmh hna. Paih pakhatnak laksawng cu Hakha Nunphun le Ca lei Committee nih an pek hna tiah kan theih.

 

Na ruahning rak langhter ve.. (Leave a comment)

%d bloggers like this: