Chin Media Phu Chungtel Tonpumhnak Ah Chin Journalist Association An Dirh

City Hunter| 2018 February 26| February 25, Kalay- Hotel GBH ah tuahmi Chin Media Network (CMN) phu chungtel tonpumhnak ah Chin Journalist Association (CJA) an dirh tiah kan theih.

Chin Journalist Association (CJA) cu February 25, CMN phu chungtel tonpumhnak ah an dirh. Tuanvo latu ding hruaitu belte thim an si rih lo. A naihniam bik Chin Media hna tonpumhnak ah hruaitu siseh, CJA ah luh khawhnak member form le zulhphung tibantuk tuah le fehter a si te lai. Cu vialte a tlamtlin khawhnak ding ah tawlreltu phu an dirh chih. Tawlreltu phu nih cun a naih niam bik Chin Media Phu (CMN) tonpumhnak ah an chuahpi lai i cu phungphai an serhmi cu fehter lai i cu ning in hruaitu zong thim an si te lai. Tawlreltu phu ah thimmi hna cu; Salai Holy Tawk Tling Thang, Salai C. Lian, Salai Hung Tun Gei le Salai DL Seeling hna an si. Member luhnak le tahfung le phungphai cu March thla chung ah lim ding in tuanvo pek an si.

 

CJA ah Chin miphun a simi Journalist paohpoah i tel khawh dih a si lai. Zei bantuk media phu i an tuan zong ah Chin an si paoh ahcun an i tel kho dih lai. Cun CJA ahcun media phu min si lo in pumpak in luh le i tel a si lai. CJA luh tikah member feee thawh a um te lai. CJA member paoh member fee thawhmi chung in chiat-that i zohkhenhnak a um lai. Thawngpang tial ruang maw, thawngpang laak ruang i harsatnak ton tikah i bawmhchanh le i dirpi a si te lai tiah kan theih.

CJA ahcun Chin miphun a simi ramchung ramleng aho paoh member ah luh khawh cio te ding in phungphai suai an timh tiah theih a si. +++

Na ruahning rak langhter ve.. (Leave a comment)

%d bloggers like this: