Chin mipi palek phu cawnnak an dih
The Chinland Post | 2022 September 6 – Chin ramkulh, Falam peng chungah rianṭuan ding in Chin mipi palek phu cawnnak cu tlamtling tein an dih tiah CNO/CNDF nih September 3 ah a thanh.
“Palek hi a herh bak ko, CNO/CNDF nih a tlaihnak hmunhma khuate pawl ah ar an fir tiah an rak phuan tawn, ralkap nih cu bantuk pawl a tawlrel dan hi a dik lo, cucaah palek cawnnak kan tuah hi a si” tiah CNO/CNDF rianngeitu nih Mizzima ah a chim.
Cu cawnnak ah cawnnak a chimtu zung nih raltuk daan, phung sining le sualphawtnak (case) pawl zohfel dan kha an chimh hna i minung 71 an kai kho tiah theih a si.
Cawnnak a dih cangmi hna nih Falam peng chung CNO/CNDF nih a tlaihnak hmunhma pawl ah khuabawi pawl he i bawm in phungning tein rian an ṭuan lai tiah a chim.
Atulio Falam peng chungah sual buarnak ngan pipi um loin thil fir le rit ruangah buainak pawl a um caah uknak phu pawl le mipi palek pawl nih an tawlrel khawhmi buainak pawl a si tiah theih a si.
Atu cawnnak a dihmi pawl hi bawmhnak zeihmanh pek an si rih lo nain hmailei ahcun lahkhah bawmhnak hna kan pek khawh te men hna lai tiah a chim.
CNO ramchung kong zung kuttang in mipi palek cawnnak pawl tuah rih a si lai i khua uknak committee pawl he i fonh in ram chung sualnak pawl a tlau khawhnak hnga le khua, sang le veng a him khawhnak hnga an tawlrel lai tiah theih a si.
Chin mipi palek phu hna cu NUG ramchung kong zung (Ministry of Home Affairs) he rianṭuanṭi a si lai tiah theih a si.
About The Author
